කොවිඩ් වසංගතය මෙතරම් ප්‍රභලව ව්‍යාප්ත වෙමින් පවතින විටදී පවා රජය විසින් රට වසා දැමීමට කටයුතු නොකිරීම සම්බන්ධයෙන් කණගාටු වන බව ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මහතා පවසනවා.
රජය විසින් රට වසා දමන තෙක් නොසිට ලබන සඳුදා සිට ස්වයං විනයකින් යුතුව නිවෙස් වලට වී සිටින ලෙසයි ඔහු ජනතාවගෙන් ඉල්ලාසිටින්නේ.
රජයේ කොවිඩ් සංඛ්‍යා ලේඛන සම්බන්ධයෙන් විශ්වාසය බිඳීගොස් ඇති බවත් බිම් මට්ටමේ රාජකාරිවල නිරතව සිටින මහජන සෞඛ්‍ය පරීක්ෂකවරුන්ට විමර්ශනය කළ නොහැකි තරමට ආසාදිතයන් වාර්තා වන බවත් ඔහු පෙන්වා දෙනවා.
එමෙන්ම, මහජන සෞඛ්‍ය පරීක්ෂකරුන් දැඩි අපහසුතාවයට පත්ව සිටින බවත්, ඔවුන්ට ජනතාව ගැන සොයා බැලීමට තමා තමන්ගේ ජීවිත ආරක්ෂා කරගත නොහැකි මට්ටම වසංගත තත්වය උත්සන්න වී ඇති බවත් ඔහු අවධාරණය කර සිටිනවා.
එබැවින්, ශීත කාමරවලට වී කේක් කමින් තීන්දු තීරණ ගැනීමට පෙර ශීත කාමරවලින් එළියට පැමිණ විසාලා මහනුවර බිමට බැස ඇත්ත තත්වය අවබෝධ කරගන්නා ලෙසත්, ජනතාව විඳින දුක පිළිබඳව අවබෝධයක් ලබාගෙන තීන්දු තීරණ ගන්නා ලෙසත් ඔහු බළධාරීන්ගෙන් ඉල්ලා සිටිනවා.
