කොංගෝ රාජ්‍යයේදී සිය ආරක්ෂාවට සිටි එම රටේ හමුදා සාමාජිකයන් දෙදෙනෙකු ලවා එරට සාමාන්‍ය වැසියන් පිරිසකට පහරදී හිංසනය මුදා හැරීමේ චෝදනාව මත චීන ජාතිකයන් දෙදෙනෙකුට නඩු පැවරීමට කොංගෝ බලධාරීන් කටයුතු කොට තිබේ.
මෙම චීන ජාතිකයන් දෙදෙනා කොංගෝවේ පතල් කැණිමේ ව්‍යාපෘතියක් මෙහෙයවන අතර ඔවුන්ගේ සහ පතලේ ආරක්ෂාවට කොංගෝ රජය හමුදා සෙබලුන් ලබාදී තිබී ඇත.
පතලට නීති විරෝධී කැණීම් සදහා පැමිණි පිරිසක් අල්ලා ගැනීමෙන් අනතුරුව ඔවුන්ට පහරදී හිංසා කොට අමානුෂික ලෙස සැලකීම සදහා මෙම චීන ජාතිකයන් දෙදෙනා සිය ආරක්ෂාවට සිටි කොංගෝ හමුදා සාමාජිකයන් පොළඹවා තිබේ.
මේ සිද්ධියේ වීඩියෝ පටයක් සමාජ මාධ්‍ය ඔස්සේ ප්‍රචාරයවීමත් සමග එම චීන ජාතිකයන්ට මෙන්ම අප්‍රිකාවේ ව්‍යාපෘතිවල නිරතව සිටින සියලුම චීන ජාතිකයන්ට එරෙහිව දැඩි මහජන විරෝධයක් නිර්මාණය විය.
කොංගෝ රජය මේ සම්බන්ධයෙන් නිසි ක්‍රියාමාර්ග නොගන්නා බවටද දැඩි ලෙස චෝදනා නැගිණ.
මේ සමගම කොංගෝ බලධාරීහු මීට සම්බන්ධ වූ සිය රටේ හමුදා සාමාජිකයන්ට එරෙහිව දැඩි විනය ක්‍රියාමාර්ග ගෙන ඇති අතර අදාළ සිද්ධිය මෙහෙයවූ චීන ජාතිකයන් දෙදෙනා අත්අඩංගුවට ගෙන නඩු පැවරීමට කටයුතු කරමින් සිටිති.
