සූරියවැව මාරාන්තික උපවාසයේ සිටි ගොවීන් දෙදෙනෙකු රෝහල්ගත කරයි

සූරියවැව මාරාන්තික උපවාසයේ නිරතව සිටි ගොවීන් දෙදෙනෙකු සූරියවැව මූලික රෝහලට ඇතුළත් කර ඇත.
ආහාර හෝ දියර කිසිවක් ලබානොගනිමින් මෙම ගොවීන් උපවාසයේ නිරතව සිටින අතර, අදාළ ගොවීන් දෙදෙනාගේ රුධිරයේ සීනි මට්ටම බරපතළ ලෙස අඩුවීම නිසා මෙසේ රෝහල්ගත කර තිබේ.
ඔවුන් දෙදෙනා වෙනුවට තවත් ගොවීන් දෙදෙනෙකු උපවාසයට වාඩි වීම අද (22) දහවල් සිදු විය.
හම්බන්තොට දිස්ත්‍රික්කයට අයත් සූරියවැව අලි කළමනාකරණ රක්ෂිතය වහාම ගැසට් කරන ලෙසත්, රක්ෂිතයට අදාළ භූමිය බලහත්කාරයෙන් පවරාගෙන සිටින දේශපාලනඥයන්ගේ හිතවතුන් ඉවත් කරන ලෙසත් බලකරමින් සූරියවැව, වල්සපුගල වැව් කණ්ඩිය මත මේ මාරාන්තික උපවාසය පවත්වනු ලබයි.
ආණ්ඩුව පාර්ශ්වයෙන් මේ ගැටළුවට විසඳුම් ලබාදීම සදහා ලබන 28 දක්වා කල් ඉල්ලා තිබේ.
ඒ අතර ආණ්ඩුවට හිතවත් පාර්ශ්ව පැමිණ උපවාසය කඩාකප්පල් කිරීමට උත්සාහ දරන බව සූරියවැව ඒකාබද්ධ ගොවි සංවිධානයේ නියෝජිතයෙක් පැවසීය.