මෑතකාලීන චීන සංචාරය පිළිබඳ මතභේදය මධ්‍යයේ එක්සත් ජාතීන්ගේ මානව හිමිකම් පිළිබඳ මහ කොමසාරිස් මිචෙල් බැචලේ වත්මන් ධූර කාලයෙන් පසු තවත් වාරයක් ඉල්ලා නොසිටීමට තීරණය කර ඇති බව වාර්තා වේ.
චීන සංචාරයේදී ෂින්ජියැන්ග් පළාතේ චීනය විසින් සිදුකරනු ලබන බව කියන මානව අයිතීන් උල්ලංඝනය කිරීම් සම්බන්ධයෙන් මිචෙල් බැචලේගේ ප්‍රතිචාරය විවේචනය කිරීමෙන් පසුව ඇය මේ තීරණය ගෙන ඇති බව පැවසේ.
කෙසේවෙතත් ට්විටර් පණිවුඩයක් මගින් බැචලේ කියා සිටියේ පුද්ගලික හේතූන් මත ඇය දෙවන වාරය අපේක්ෂා නොකරන බවයි.
තමා දෙවන ධූර කාලයක් අපේක්ෂා නොකරන බවත් ආපසු චිලී වෙත ගොස් පවුලේ අය සමඟ සිටීමට කාලය එළඹ ඇති බවත් ඇය පවසා තිබේ.
එක්සත් ජාතීන්ගේ මානව හිමිකම් පිළිබඳ මහ කොමසාරිස්ගේ දින 6 ක චීන සංචාරයෙන් පසු සුළු ජාතීන්ගේ මානව හිමිකම් වෙනුවෙන් පෙනීසිටීමට ඇය අපොහොසත් වූ බවට චෝදනා එල්ල වූ අතර මානව හිමිකම් වෙනුවෙන් පෙනී සිටින කණ්ඩායම් 230 ක් ඒ බව සදහන් කර තිබිණ.
ඔවුන් එහිදී ඉල්ලා සිටියේ එක්සත් ජාතීන්ගේ අයිතිවාසිකම් ප්‍රධානියා වහාම සිය ධූරයෙන් ඉල්ලා අස්විය යුතු බවයි.
