එළඹ ඇති ඊද් උත්සව සමය පදනම් කරගෙන සටන් විරාමයකට එළඹෙන්නැයි එක්සත් ජාතීන්ගේ සංවිධානය ඇෆ්ගනිස්තානයේ සටන් වදින සියලු පාර්ශවවලින් විශේෂ ඉල්ලීමක් සිදුකර තිබේ.
එක්සත් ජාතීන්ගේ සංවිධානයේ ඇෆ්ගනිස්තාන කාර්යාලය පෙන්වා දී ඇත්තේ දැනට පවතින ගැටුම් හේතුවෙන් මහා පරිමාණයෙන් සිදුවන මානව හිමිකම් උල්ලංඝනයවීම සම්බන්ධයෙන් තමන්ගේ දැඩි අවධානයක් යොමුව ඇති බවයි.
ඝාතන, අමානුෂික සහ වෙනස් කොට සැලකීම් ආදී සිදුවීම් වාර්තා වීම විශාල ලෙස ඉහළ ගොස් ඇති බව එම කාර්යාලය වැඩිදුරටත් පෙන්වා දී තිබේ.
මෙය සාමාන්‍ය ජනතාව තුළ බිය සහ අනාරක්ෂිතභාවය වර්ධනය කර ඇති බවත් මේ සම්බන්ධයෙන් සටන්වැදී සිටින සියලු පාර්ශව වගකිව යුතු බවත් එක්සත් ජාතීන්ගේ සංවිධානය ප්‍රකාශ කරයි.
මෙහිදී කාන්තාවන්, ළමුන් වැනි ආන්තික කණ්ඩායම් දැඩි පීඩාවට පත්ව සිටින බවත් මෙම තත්වය වැළැක්වීම සදහාවන විසදුමක් ලෙස කඩිනම් සටන් විරාමයකට යොමුවන ලෙසත් එම සංවිධානය වැඩිදුරටත් අවධාරණය කර තිබේ.
මේ අතර විදෙස් මාධ්‍ය වාර්තා කරන්නේ ඇෆ්ගනිස්තානය පුරා රජයේ හමුදා සහ තලේබාන් සංවිධානය අතර සිදුවන ගැටුම් දිනෙන් දිනම උග්‍ර තත්වයට හැරෙමින් ඇති බවයි.
