කාබුල් අගනුවරට එල්ල කිරීමට පැමිණි මරාගෙන මැරෙන බෝම්බ ප්‍රහාරයක් ඇමෙරිකානු හමුදා විසින් ව්‍යර්ථ කළ බව රොයිටර්ස් පුවත් සේවය වාර්තා කරයි.
මරාගෙන මැරෙන බෝම්බ ප්‍රහාරයක් එල්ල කිරීමේ අපේක්ෂාවෙන් පැමිණි පුපුරණ ද්‍රව්‍ය පිරවූ මෝටර් රථයකට ඇමෙරිකානු හමුදා ප්‍රහාරයක් එල්ල කර ඇතැයි ද එම පුවත් වාර්තාවේ දැක්වේ.
කාබුල් අගනුවර හමීඩ් කර්සායි ගුවන් තොටුපොළට වයඹ දෙසින් සිදු වූ පිපිරීම හෝ මේ කියන ප්‍රහාරය එකක් ද දෙකක් ද යන්න පිළිබඳව මෙතෙක් නිශ්චිතව තොරතුරු වාර්තා වී නැත.
මීටටික වේලාවකට පෙර කාබුල් ගුවන් තොටුපොළට වයඹ දෙසින් දැවැන්ත පිපිරීමක් සිදු වූ බවටත් රොකට් ප්‍රහාරයක් එල්ල වූ බවටත් ඇෆ්ගන් මාධ්‍ය මෙන්ම විදෙස් මාධ්‍ය ද වාර්තා කළේය.
අයි.එස්.අයි.එස්.-කේ. සටන්කාමීන් ඉලක්ක කරගනිමින් ඇමෙරිකානු හමුදා ඉහත කී ප්‍රහාරය එල්ල කළේ යැයි ද ඇමෙරිකානු නිලධාරියකු උපුටා දක්වමින් රොයිටර්ස් පුවත් සේවය තවදුරටත් වාර්තා කර ඇත.
