වසර 20කට පසු ඇමෙරිකානු හමුදා ඊයේ (30) ඇෆ්ගනිස්තානයෙන් නික්ම ගියේ ය.
මීට වසර 20කට පෙර 2001 සැප්තැම්බර් 11 වැනිදා ඇමෙරිකාවට එල්ල වූ ත්රස්ත ප්රහාරයෙන් පසුව ඇමෙරිකා එක්සත් ජනපදය ත්රස්තවාදයට එරෙහිව යුද ප්රකාශ කළ අතර තලේබාන් සංවිධානය අල්කයිඩාවට සහාය දෙන බව ට චෝදනා කරමින් ඇෆ්ගනිස්තානය ආක්රමණය කරමින් තලේබාන් සංවිධානය සමඟ යුද වැදුණි.
ඇෆ්ගනිස්තානය තලේබාන් ග්රහණයෙන් මුදා ගත් ඇමෙරිකාව, ඔවුන්ගේ මැදිහත්වීමෙන් ආණ්ඩුවක් පිහිටුවීය.
එතැන් පටන් මේ දක්වා ඇෆ්ගන් රජයේ හමුදා එක්වෙමින් ඇමෙරිකානු හමුදා ඇතුළු බටහිර හමුදා තලේබාන් සංවිධානය සමඟ යුද වැදුණු ඇමෙරිකාවේ හිටපු ජනාධිපතිවරුන් බැරැක් ඔබාමා, ඩොනල්ඩ් ට්රම්ප් යන දෙදෙනාම ඇෆ්ගනිස්තානයෙන් හමුදා ඉවත් කරගන්නා බව ප්රකාශ කර තිබිණි.
එනමුත් ඔවුන්ගේ පාලන කාල තුළ එම ක්රියාවලිය අවසන් නොවිණි.
ජෝ බයිඩන් ඇමෙරිකා එක්සත් ජනපද ජනාධිපති ධුරයේ දිවුරුම් දුන්නේ මේ වසරේ දී ය.
ඉකුත් මැයි මාසයේ දී ඇමෙරිකානු හමුදා සම්පූර්ණයෙන්ම ඇෆ්ගනිස්තානයෙන් ඉවත් කරගන්නා බව ජනාධිපති ජෝ බයිඩන් ප්රකාශ කළේ ය.
ඒ අනුව අගෝස්තු 31 වැනිදා වනවිට එම ක්රියාවලිය සම්පූර්ණයෙන්ම අවසන් කරන බව ද හෙතෙම කීය.
කෙසේ නමුත් මුලින් ප්රකාශ කළ දිනට, දිනක් කලියෙන් සිය හමුදා ඉවත් කරගැනීමට ඇමෙරිකාව කටයුතු කළේය.
ඇෆ්ගනිස්තානයෙන් පිට වූ අවසන් ඇමෙරිකානු සොල්දාදුවා වන්නේ ඇමෙරිකා එක්සත් ජනපද හමුදාවේ මේජර් ජෙනරාල් ක්රිස් ඩොනහියු ය.
අවසන් පැය 24 දී 1,200කට ආසන්න පිරිසක් ඇෆ්ගනිස්තානයෙන් මුදාගත් බව ඇමෙරිකානු බලධාරීහු ඊයේ (30) පැවැසූහ.
කෙසේ නමුත් ඇමෙරිකාවට යා හැකි හෝ එවැනි වීසා ඇති පුද්ගලයන් හෝ ඇමෙරිකාවට යෑමට සුදුසුකම් ලැබූ පුද්ගලයන් 100,000ක් හෝ ඊට වැඩි පිරිසක් තවමත් ඇෆ්ගනිස්තානයේ රැඳී සිටින බව ද පැවසේ.
ඇෆ්ගනිස්තානයෙන් පිටව යෑමට බලාපොරොත්තු වන පුද්ගලයන්ට නියමිත ක්රමවේදය අනුව අගෝස්තු 31 වැනිදායින් පසුව රටින් පිටව යා හැකි යැයි තලේබාන් සංවිධානය ප්රකාශ කර ඇත.
කෙසේ නමුත් ඒ සම්බන්ධයෙන් අවිනිශ්චිත තත්ත්ව පවතින බව ද වාර්තා වේ.