රවීණ රංගන ශිල්පිනියක්, මාධ්‍යවේදිනියක් සහ හිටපු ගුවන් විදුලි ප්‍රවෘත්ති නිවේදිකාවක් වන රම්‍යා වනිගසේකර මහත්මිය අද (08) අභාවප්‍රාප්ත වී තිබෙනවා.
කලා ක්ෂේත්‍රයේ විවිධ මං ඔස්සේ සිය ප්‍රතිභාව විදහා දැක් වූ රම්‍යා වනිගසේකර මහත්මිය අභාවප්‍රාප්ත වන විට 73 වන වියේ පසු වුණා.
ඇය ගුවන්විදුලියේ A ශ්‍රේණියේ නූර්ති ගී ගායිකාවක් වන අතර, රංජිත් ධර්මකීර්තිගේ ‘හස්තිරාජ මහත්මයා’ වේදිකා නාට්‍ය තුළින් රංගන ශිල්පිනියක ලෙස කලා ලොවට පිවිසි රම්‍යා, සඳ කිඳුරි, මූදු පුත්තු, හිරු නැති ලොව, සිරිසඟබෝ ඇතුළු නාට්‍ය ගණනාවකට දායක වුණා.
1978 දී ආර්.ආර්. සමරකෝන්ගේ ‘කැලණි පාලම’ නාට්‍යයේ ප්‍රධාන භූමිකාව වන මැටිල්ඩාගේ චරිතය සඳහා ඇය තෝරාගැනීම, ඇගේ ජීවිතයේ හැරවුම් ලක්ෂයක් වුණා.
ධම්ම ජාගොඩගේ ‘පළිඟු මැණිකේ’ හරහා ආරම්භ වූ ඇගේ රූපවාහිනී ගමන් මඟ ද සුවිශේෂී එකක් වන අතර, එදා මෙදාතුර ටෙලි නිර්මාණ රුසකට දායක වූ රම්‍යා, සම්මාන රැසකට ද පාත්‍ර වී තිබුණා.
