ශ්රී ලංකා නිදහස් පක්ෂයේ මහ ලේකම් ධුරයෙන් ඉවත් කරනු ලැබූ දයාසිරි ජයසේකර මහතාට ජ්යෙෂ්ඨ උප සභාපති ධුරයක් ලබා දීමට පක්ෂයේ ජ්යෙෂ්ඨයන් පිරිසක් යෝජනා කර ඇතැයි දේශපාලන ආරංචි මාර්ග සඳහන් කරනවා.
ඔහු නැවත පක්ෂය සමඟ සම්බන්ධ වන්නේ නම් පක්ෂයේ සභාපති ධුරය ලේකම් ධුරය හෝ ජාතික සංවිධායක ධුරය හැර වෙනත් තනතුරක් ලබා දිය හැකි බව පක්ෂයේ සභාපති හිටපු ජනාධිපති මෛත්රිපාල සිරිසේන මහතා මීට පෙර ප්රකාශ කර තිබුණා.
ඒ අනුව පක්ෂයේ ජ්යෙෂ්ඨයන් පිරිසක් ඔහුට පක්ෂයේ ජ්යෙෂ්ඨ උප සභාපති ධුරයක් ලබා දීම සුදුසු බවට යෝජනා කර ඇති බව වාර්තා වෙනවා.
ශ්රී ලංකා නිදහස් පක්ෂයේ ජ්යෙෂ්ඨ උප සභාපතිවරුන් 6 දෙනකු සිටින අතර දයාසිරි ජයසේකර මහතා එම තනතුර භාර ගතහොත් පක්ෂයේ ජ්යෙෂ්ඨ උප සභාපතිවරුන් ගණන හතක් බවට පත්වීමට නියමිතයි.
මේ අතර, ශ්රී ලංකා නිදහස් පක්ෂයේ මහ ලේකම් ධුරයෙන් ඉවත් කරනු ලැබූ දයාසිරි ජයසේකර සමඟි ජන බලවේගයේ ආසන සංවිධායකවරයෙකු ලෙස පත් කිරීමට නියමිත බව දේශපාලන ආරංචිමාර්ග අනුව පුවත් පළ වී තිබුණා.
ඒ අනුව සමඟි ජන බලවේගයේ පඬුවස්නුවර ආසන සංවිධායක ධුරය දයාසිරි ජයසේකර වෙත ලබා දීමට කටයුතු සූදානම් කරමින් සිටින අතර එම ආසනයේ සංවිධායකවරයාව සිටි තුෂාර ඉඳුනිල් අමරසේන මහතා වාරියපොළ සංවිධායක ලෙස මාරු කර ඇති බවත් තහවුරු වී තිබෙනවා.
පසුගිය සතියේ තුෂාර ඉඳුනිල් වාරියපොළ ආසන සංවිධායක ලෙස වැඩ භාර ගෙන තිබුණා.
ඒ අනුව ශ්රී ලංකා නිදහස් පක්ෂයෙන් තනතුරෙන් ඉවත් කිරීම ඇතුළුව සිදු වූ අකටයුතු කම් හේතුවෙන් දයාසිරි ජයසේකර මහතා සමඟි ජන බලවේගය සමඟ එක්විය හැකි බවටද ආරංචි පැතිරී තිබෙනවා.
කෙසේවෙතත්, දයාසිරි ජයසේකර මහතා පවුලේ අය සමඟ මේ වන විට විදේශගත වී සිටින අතර ඔහු යළි මෙරටට පැමිණෙන දිනයක් පිළිබඳවද මෙතෙක් නිශ්චිතව දැනුම් දී නොමැති බවයි වාර්තා වෙන්නේ.