නුවරඑළිය, මීපිළිමාන ප්‍රදේශයේ පැවති අලුත් අවුරුදු උත්සවයකට පසුගිය ඉරිදා (14) ජනාධිපති රනිල් වික්‍රමසිංහ එක්ව සිටියා.
පැරණි සිරිත් විරිත්වලට මුල්තැන දෙමින් සංවිධානය කර තිබූ මෙම අලුත් අවුරුදු උත්සවය සාම්ප්‍රදායික ක්‍රිඩා අංග මෙන්ම සංස්කෘතිකාංග රැසකින් සමන්විතව පවත්වා තිබෙනවා.
අවුරුදු උත්සව භූමිය වෙත පැමිණි ජනාධිපතිවරයා අවුරුදු තරග කිහිපයක් නැරුඹූ අතර, පෙරවරුවේ පැවැති බක්මහ පාපැදි තරගයේ ජයග්‍රාහකයන්ට ත්‍යාග ලබාදීම සිදුකර තිබුණා.
මීපිළිමාන අවුරුදු උත්සවය සඳහා සංචාරක හා ඉඩම්, ක්‍රීඩා හා යෞවන කටයුතු අමාත්‍ය හරීන් ප්‍රනාන්දු මහතාද එක්ව සිටියා.
පාර්ලිමේන්තුවේ විපක්ෂය නියෝජනය කරමින් සිටින විමල් වීරවංශ මන්ත්‍රීවරයාගේ නායකත්වයෙන් යුතු ජාතික නිදහස් පෙරමුණේ නුවරඑළිය දිස්ත‍්‍රික් පාර්ලිමේන්තු මන්ත්‍රී නිමල් පියතිස්ස මහතාද ජනාධිපතිවරයා සමඟ එම අලුත් අවුරුදු වේදිකාවේ එක්ව සිටීම විශේෂත්වයක්.
