වැලිකඩ බන්ධනාගාරය හොරණ ප්‍රදේශයට රැගෙනවිත් අධි ආරක්ෂිත බන්ධනාගාරයක් බවට පත් කිරීමට සැලසුම් කර ඇති බව ලොහාන් රත්වත්තේ රාජ්‍ය අමාත්‍යවරයා පවසනවා.
එමගින් බන්ධනාගාර තුළ පවතින තදබදය ද අඩු කරගත හැකි බව ගාල්ල – බූස්ස බන්ධනාගාරයේ නිරීක්ෂණ චාරිකාවකට එක්වෙමින් රාජ්‍ය අමාත්‍යවරයා සදහන් කළා.
“ලංකාවේ සිටින භයානක කියලා කියන සිරකරුවන් සියලු දෙනාම මේ බන්ධනාගාරයට ගේන්නයි බලාපොරොත්තුව. දැනට මෙහි අධි ආරක්ෂිත කුටි 32ක් තියෙනවා. තවත් කුටි 32ක් මාස දෙකකින් අපිට නිමකර ගන්න පුළුවන් වෙයි. බන්ධනාගාර අමාත්‍යාංශය භාර ගන්නකොට බන්ධනාගාරවල 30,000ක් විතර රැඳවියන් හිටියා. අද අපි ඒක 19,000කට පමණ අඩු කරලා තියෙනවා. අපි විශේෂයෙන්ම බලාපොරොත්තුවෙන්නේ වැලිකඩ බන්ධනාගාරය හොරණට ගෙන ගිහින් අධි ආරක්ෂිත නවීනතම බන්ධනාගාරයක් හදලා බන්ධනාගාර තදබදය අඩු කරන්නයි.”
කෙසේ වෙතත් පසුගිය දෙසැම්බර් 25 වනදා මහනුවරදී ප්‍රවෘත්ති සාකච්ඡාවකට එක්වෙමින් ලොහාන් රත්වත්තේ මහතා සදහන් කළේ අක්කර 48 කින් යුත් වැලිකඩ බන්ධනාගාර ඉඩම ඉහළ වාණිජ වටිනාකමකින් යුක්ත බැවින් එය වෙනත් වාණිජ කටයුත්තක් සදහා භාවිතා කිරීමට අවධානය යොමුව ඇති බවයි.
කෙසේ වෙතත් එම වාණිජ කටයුත්ත කුමක්දැයි ඔහු සදහන් කළේ නැහැ.
සිරකරු අයිතීන් සුරැකීමේ සංවිධානය චෝදනා කරන්නේ අදාල ඉඩම චීන සමාගමකට පැවරීමට රජය කටයුතු කරමින් සිටින බවයි.
ඉහළ වටිනාකමකින් යුත් මේ ඉඩම කෙරෙහි චීනයේ අවධානය යොමුව ඇති බැවින් වැලිකඩ බන්ධනාගාරය හොරණ ප්‍රදේශයට රැගෙන ගොස් මෙම ඉඩම හිස් කිරීමට මේ වන විට කටයුතු සකස් කරමින් සිටින බව එම සංගමය සදහන් කරනවා.
