බස්නාහිර පළාතේ පාසල්වල සාමාන්‍ය පෙළ පංති ආරම්භ කළ අද(25) දිනයේ සිසුන්ගේ පැමිණීම සියයට 40කට වඩා අඩු යැයි ලංකා ගුරු සංගමයේ ලේකම් ජෝසප් ස්ටාලින් මහතා ‘නිව්ස් 19’ ට පැවැසීය.
කොළඹ රාජකීය, ආනන්ද ආදී ජනප්‍රිය පාසල්වල මෙම පැමිණීම අතිශය පහළ අගයක් ගන්නේ යැයි ද ස්ටාලින් මහතා කීවේය.
මෙසේ පාසල් සිසුන්ගේ පැමිණීම අඩුවීමට ප්‍රධාන හේතුව සෞඛ්‍යාරක්ෂාව සම්බන්ධයෙන් මවුපියන්ට විශ්වාසයක් නොවීම යැයි ස්ටාලින් මහතා කීය.
ජනවාරි 11 වැනිදා පාසල් ආරම්භ කිරීමෙන් පසුව මේ වනවිට පාසල් සිසුන් 20 දෙනකුට පමණ කොවිඩ් වයිරසය ආසාදනය වී ඇතැයි කී හෙතෙම මේ නිසා මවුපියන් සිය දරුවන් පාසල් යැවීමට බියෙන් පසුවන්නේ යැයි ද පැවැසීය.
ප්‍රමිතියෙන් යුත් මුඛ ආවරණ පාසල් දරුවන්ට ලබා දී අඛණ්ඩව පාසල් ධූමායනය කරන්නැයි ගුරු සංගම් අධ්‍යාපන බලධාරින්ගෙන් ඉල්ලා සිටියේ මෙම තත්ත්වය උද්ගත වන නිසා යැයි ද ස්ටාලින් මහතා සඳහන් කළේය.
ආණ්ඩුව එම එල්ලීම් නොසලකා හැරියහොත් ඉදිරියේ දී තත්ත්වය තවත් නරක අතට හැරෙනු ඇතැයි ද ස්ටාලින් මහතා වැඩිදුරටත් සඳහන් කළේය.
