ඇමරිකා එක්සත් ජනපද කතානායක නැන්සි පෙලෝසි තායිවානයේ සංචාරයක් සඳහා ගොස් තිබෙනවා.
එම සංචාරය සිදු නොකරන ලෙසට චීනය සිදු කළ තර්ජන නොසලකමින් එම සංචාරය සිදු කළ ඇය ඊයේ පස්වරුවේ තායිවානයට ගොඩ බැස තිබෙනවා.
ඇය ආසියානු රටවල් කිහිපයකට යෑමට නියමිත අතර තායිවානය ට පැමිණ ඇත්තේ ඒ අතරතුරදීයි
ඇමරිකානු කතානායකවරිය ගේ තායිවාන සංචාරයක් සමග චීනය තායිවානය ආසන්නයේ ඇති ෆුජියාන් ප්‍රදේශයට ඔවුන්ගේ සන්නද්ධ රථ සහ ආරක්ෂක හමුදාවන් විශාල ලෙස පෙළගස්වන බවත් මේ වන විටත් චීන SU 35 වර්ගයේ ප්‍රහාරක ගුවන් යානා ඛණ්ඩයක් තායිවාන සමුද්‍ර සන්ධිය දෙසට පියාසර කරමින් සිටින බවත් ජාත්‍යන්තර මාධ්‍ය පෙන්වා දෙනවා.
චීන පාලනයෙන් මිදී ස්වයං පාලනයක් භුක්ති විඳින තායිවානය, සිය රටේ කොටසක් ලෙස චීනය සලකන අතර චීන මධ්‍යම ආණ්ඩුවේ අනුමැතියකින් තොරව ඇමරිකානු රාජ්‍ය නිලධාරීන් එහි සංචාරය කරන්නේ නම් ඔවුන් හට බරපතල ප්‍රතිවිපාක විඳීමට සිදු වනු ඇති බවටයි චීනය අනතුරු අඟවා සිටියේ.
වසර 25කට ආසන්න කාලයකදී තායිවානයේ සංචාරයේ නිරත වන ඉහලම එක්සත් ජනපද රාජ්‍ය නිලධාරියා වන්නේ නැන්සි පෙලෝසි යි. මෙම සංචාරය තුළ දී ඇමෙරිකානු කතානායකවරිය තායිවානයේ දින හතරක් ගත් කිරීමට නියමිතව ඇති අතර එහිදී ඇය ද්විපාර්ෂික සාකච්ඡා කිහිපයකට එක්වන බවයි වාර්තා වන්නේ.
