ඉන්ධන මිල ඉහළ නැංවමින් මේ මොහොතේ ජනතාව අපහසුතාවයට පත්කල තීරණය සම්බන්දයෙන් වගකීම භාරගෙන තමන්ට ඉල්ලා අස්වෙන්නැයි ශ්‍රී ලංකා පොදුජන පෙරමුණේ ලේකම්වරයාගේ අත්සනින් නිකුත් කර ඇති මාධ්‍ය නිවේදනයට පිළිතුරු දීම සඳහා බලශක්ති අමාත්‍ය උදය ගම්මන්පිල මහතා සූදානම් වනවා.
ඒ අනුව අද (13) පස්වරු 2 ට බලශක්ති අමාත්‍යාංශයේදී ප්‍රවෘත්ති සාකච්ඡාවක් පවත්වා අදාළ චෝදනාවන් හට පිළිතුරු දීමට නියමිත බවයි උදය ගම්මන්පිල මහතා නිවේදනය කරන්නේ.
ශ්‍රී ලංකා පොදුජන පෙරමුණ ඊයේ (12) නිකුත් කළ නිවේදනයේ දැක්වුණේ ඉන්ධන මිල ඉහළ දමමින් උදය ගම්මන්පිල මහතා වුවමනාවෙන්ම ශ්‍රී ලංකා පොදුජන පෙරමුණ හා එහි නායකයන් අප්‍රසාදයට පත්කිරීම උදෙසා කටයුතු කරන්නේදැයි සාධාරණ සැකයක් ඇතිව ඇති බවටයි.
කෙසේ වෙතත් පෙරේදා (11) පැවති ප්‍රවෘත්ති සාකච්ඡාවේදී බලශක්ති අමාත්‍ය උදය ගම්මන්පිල මහතා සඳහන් කළේ ඉන්ධන මිල වැඩිකිරීමේ තීරණය ජීවන වියදම් පිළිබද අමාත්‍ය අනුකමිටුව විසින් ගත් බවයි.
අමාත්‍ය අනුකමිටුවෙහි සාමාජිකයන් වන්නේ සභාපතිවරයා ලෙස අග්‍රාමාත්‍ය මහින්ද රාජපක්ෂ, සාමාජිකයන් ලෙස බන්දුල ගුණවර්ධන, මහින්දානන්ද අලුත්ගමගේ, ශෂීන්ද්‍ර රාජපක්ෂ, අරුන්දික ප්‍රනාන්දු, ලසන්ත අලගියවන්න, අජිත් නිවාඩ් කබ්රාල් යන අයයි.
මීට අමතරව අදාළ තීරණය ගත් ජුනි 09 වැනිදා පැවති ජීවන වියදම් පිළිබඳ අමාත්‍ය අනුකමිටු රැස්වීමට උදය ගම්මන්පිල, ඩලස් අලහප්පෙරුම හා නාමල් රාජපක්ෂ යන අමාත්‍යවරුන්ද සහභාගීවී ඇති බවයි වාර්තා වන්නේ.
