ඉහළ පොලිස් නිලධාරියෙකු විසින් තර්ජනය කර ඇති මාධ්‍යවේදී තරිඳු ජයවර්ධන මහතාට සාධාරණය ඉටු කරන ලෙස ඉල්ලමින් එක්සත් ජාතික පක්ෂය ඊයේ (4) විශේෂ ප්‍රකාශයක් සිදුකර තිබේ.
ඒ අනුව එම පක්ෂයේ නියෝජ්‍ය නායක රුවන් විජයවර්ධන මහතා විසින් වසර ගණනාවක් තිස්සේ මාධ්‍යවේදීන් මෙන්ම සමාජ මාධ්‍ය භාවිතා කරන්නන් ද රජයේ සහ ඉහළ පොලිස් නිලධාරීන්ගේ විවේචන හා වක්‍ර තර්ජනයන්ට ලක්ව සිටින බව පෙන්වා දී ඇත.
මාධ්‍යවේදී තරිඳු එරංග ජයවර්ධන යනු නිදහස් අදහස් ප්‍රකාශ කිරීමේ අයිතිය තර්ජනයට ලක් වූ කණ්ඩායමේ නවතම සාමාජිකයා බව ඔහු පවසයි.
මේ මස පළමුවැනිදා මාධ්‍යවේදී තරිඳු ජයවර්ධන ෆේස්බුක් ඔස්සේ බෙදාගත් ප්‍රවෘත්තියක් සම්බන්ධයෙන් බස්නාහිර පළාත් භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් දැක්වූ ප්‍රතිචාරය පොලිස් නිලධාරියෙකුට නුසුදුසුය.
ජයවර්ධන තරුණ මාධ්‍යවේදියෙකු ලෙස නිර්භීත විචාරකයෙකි.
සත්‍ය තොරතුරු මහජනයා අතරට ගෙන යන මාධ්‍යවේදියෙකු ලෙස පුළුල් ලෙස හඳුනාගත් මාධ්‍යවේදියෙකි.
