ඉදිරි මාස 04 ක කාලය සඳහා ගොවීන්ට අවශ්‍ය පොහොර තොග තිබෙන බැවින් කිසිදු වගාවක් සඳහා පොහොර හිගයක් නොමැති බව කෘෂිකර්ම අමාත්‍ය මහින්දානන්ද අලුත්ගමගේ මහතා පවසනවා.
ඒ ඊයේ (06) පාර්ලිමේන්තුවේදී ප්‍රකාශයක් සිදු කරමින්.
දැනට ගබඩා කරගෙන ඇති සියලු පොහොර තොග ගොවිජන සේවා මධ්‍යස්ථාන වෙත මුදා හරින්නැයි පොහොර සමාගම් වෙත ඊයේ උපදෙස් ලබාදුන් බවත්, රටතුළ කිසිදු පොහොර අර්බුදයක් නොමැති බවත් අමාත්‍යවරයා වැඩිදුරටත් පවසනවා. මේ වනවිට පොහොර සමාගම් සතු ගබඩාවල පොහොර මෙට්‍රික් ටොන් 102,000 ක් ඇති බවයි ඔහු පෙන්වා දෙන්නේ.
එසේ තිබියදී ගොවීන් යැයි හඳුන්වා ගන්නා සුළු පිරිසක් රටේ තැනින් තැන උද්ඝෝෂණ පවත්වමින් සිටින බවත්, ඔවුන් සැබෑ ගොවීන් නොව දේශපාලන කණ්ඩායම්වල සාමාජිකයන් බවත් අලුත්මගමගේ ඇමතිවරයා සඳහන් කරනවා. උද්ඝෝෂණවලට ප්‍රසිද්ධ දේශපාලන පක්ෂයක සටන් පාඨ හා විරෝධතා පුවරු එම ගොවි උද්ඝෝෂණවල දක්නට ලැ‍බෙන බව පෙන්වා දෙන ඇමතිවරයා පවසන්නේ ගොවීන් පාරට බස්සවා, ගොවියෙක් මරණයට පත්කර හෝ බලය ලබා ගැනීම එම දේශපාලන පක්ෂයේ අරමුණ වී ඇති බවයි.
