චීනයේ රාජ්‍ය අනුග්‍රහය ලබන සයිබර් ප්‍රහාරක කණ්ඩායම් සම්බන්ධයෙන් ඇමරිකාව, නේටෝ සංවිධානය ඇතුළු තවත් රටවල් රැසක් අනතුරු අඟවා තිබේ.
මෙම හැකරුන් ඇමරිකාව, යුරෝපා රටවල්, බ්‍රිතාන්‍යය ඇතුළු නේටෝ සාමාජික රටවල්ද ඕස්ට්‍රේලියාව සහ නවසීලන්තය වැනි රටවල් ද ඉලක්ක කරගෙන සයිබර් ප්‍රහාර එල්ල කළ හැකි බව අදාළ අනතුරු ඇගවීම් නිවේදනයේ දැක්වේ.
ඇමරිකාව ඇතුළු රටවල් කිහිපයක සයිබර් ආරක්ෂණ ඒකක මගින් නිකුත් කර ඇති එම ඒකාබද්ධ නිවේදනයේ දැක්වෙන්නේ නව තාක්ෂණය, සංවේදී දත්ත සහ බුද්ධිමය දේපළ සොරාගැනීම මෙම සයිබර් ප්‍රහාරකයන්ගේ මූලික අරමුණ බවයි.
මේ හේතුවෙන් අදාළ රටවල ආර්ථික, දේශපාලන ආරක්ෂක ,අධ්‍යාපනික, සහ තීරණාත්මක යටිතල පහසුකම් සම්බන්ධ දත්ත ඇතුළත් පරිගණක පද්ධති ආරක්ෂාවට අදාළව උපරිම ක්‍රියාමාර්ග ගන්නා ලෙසද එම සයිබර් ආරක්ෂණ ඒකක අවධාරණය කර තිබේ.
මේ අතර ඔස්ලෝහි චීන තානාපතිවරයා තමන් වෙත කැදවූ නෝර්වේ විදේශ අමාත්‍යාංශය පසුගිය මාර්තු මාසයේදී එරට පාර්ලිමේන්තුවට එල්ල වූ සයිබර් ප්‍රහාරයක් සම්බන්ධයෙන් සිය විරෝධය පළකර තිබේ.
ඉකුත් මාර්තු මාසයේ නෝර්වේ පාර්ලිමේන්තුවට එල්ල වූ සයිබර් ප්‍රහාරය චීනයේ සිට ක්‍රියාත්මක වූවක් බව අනාවරණයවීම ඊට හේතුවයි.
