වර්තමානයේ රජය මුහුණ දී ඇති විදේශ ණය ගෙවීම ඇතුළු විදේශ විනිමය අර්බුදය සම්බන්ධයෙන් ඇතැම් අය දෙන ඒකම උපදෙස ජාත්‍යන්ත්තර මූල්‍ය අරමුදල (IMF) වෙත යාම පමණක් බව මුදල්, ප්‍රාග්ධන වෙළෙඳපොළ හා රාජ්‍ය ව්‍යවසාය ප්‍රතිසංස්කරණ රාජ්‍ය අමාත්‍ය අජිත් නිවාඩ් කබ්රාල් මහතා පවසනවා.
ඒ, ඊයේ (03) පාර්ලිමේන්තුවේ දී අදහස් දක්වමින්
කෙසේ නමුත්, ජාත්‍යන්තර මූල්‍ය අරමුදල වෙත යනවාට අමතරව විකල්ප තමන් සතු බවත් මේ වන විට ඒවා ක්‍රියාවට නංවා ඇති බවත් රාජ්‍ය අමාත්‍ය කබ්රාල් මහතා මෙහිදී අවධාරණය කර සිටින අතර මෙම වසරේ දී සියයට 5 ක ආර්ථික වර්ධන වේගයක් ලඟා කර ගැනීමට බලාපොරොත්තු වන බව ද ඔහු පවසනවා.
“තවත් අය අපට උපදෙස් දෙනවා. උපදෙස් දෙන ඒකේ වරදක් නැහැ. සමහරක් වෙලාවට ඒ අයගේ තියෙන්නේ ඒකම ඒක උපදෙසයි. ‘යන්න IMF ලඟට’. ඒක තමයි ඒගොල්ලෝ කියන්නේ. ඒගොල්ලන්ට තේරෙන්නේ නැහැ මේ IMF ඒකට යන ඒක විතරක් නෙමෙයි කියලා තියෙන විකල්පය. තව විකල්ප තියෙනවා. IMF ඒකට යන්නේ සමහරක් වෙලාවට වෙන විකල්පයක් නැති කොට. මෙතන විකල්ප තියෙනවා, අපි ඒ විකල්ප දැන් දිනපතාම ඒවා ක්‍රියාත්මක කරවනවා. ක්‍රියාත්මක කිරීම තුළින් අපේ ආර්ථිකය තවදුරටත් වර්ධනය වෙන බව අපි දන්නවා. ආර්ථික වර්ධන වේගය මේ අවුරුද්දේ දී අපි හිතන්නේ සියයට 5 ක පමණ වර්ධන වේගයක් ඇති කර ගන්න අපට පුළුවන් වෙනවා. ඒන අවුරුද්දේ ඊටත් වඩා වර්ධන වේගයක් ඇති කර ගන් අපට පුළුවන් වෙනවා. ඒ නිසා කිසිම කෙනෙක් බයක් සැකක් තබා ගන්න අවශ්‍ය නැහැ මේ රටේ අර්බුදයක් ඇතිවෙයි කියලා.”
