සමලිංගිකත්වය යනු මනෝ ව්‍යාධියක් හේතුවෙන් ඇතිවන්නක් නොවන බව ශ්‍රී ලංකා මනෝවෛද්‍යවරුන්ගේ විද්‍යාලය (Sri Lanka College of Psychiatrists – SLCP) පවසනවා.
තමා මනෝ උපදේශිකාවක් යැයි හඳුන්වා ගන්නා තැනැත්තියක් විසින් මහනුවර පොලිස් ශ්‍රවණාගාර‍යේදී පැවැත්වූ පුහුණු වැඩමුළුවකදී සිදු කළ ආන්දෝලනාත්මක ප්‍රකාශයට පිළිතුරු දෙමින් විශේෂ නිවේදනයක් නිකුත් කරමින් ශ්‍රී ලංකා මනෝවෛද්‍යවරුන්ගේ විද්‍යාලය පවසන්නේ නූතන වෛද්‍ය විද්‍යාත්මක පිළිගැනීම අනුව ලිංගික අනන්‍යතාවයේ විවිධත්වයක් පැවතීම රෝගයක් ලෙස නොසලකන බවයි. එමෙන්ම, මෙම මිත්‍යා මතයට කිසිඳු විද්‍යාත්මක පදනමක් නොමැති බවද ඔවුන් පෙන්වා දෙනවා.
එම මනෝ උපදේශිකාවක් යැයි හඳුන්වා ගන්නා තැනැත්තිය විසින් එම පුහුණු සැසිය අමතමින් ප්‍රකාශ කර සිටියේ සමලිංගිකත්වය යනු මානසික රෝගයක් බවයි. එමෙන්ම, තමන්ගේ දරුවන් සමලිංගිකයෙකුට “ගොදුරු” වනවාට කැමතිදැයි ඇය පොලිස් නිලධාරීන්ගෙන් විමසා සිටියා.
ඇයගේ මෙම ප්‍රකාශය මෙරට මෙන්ම ජාත්‍යන්තර අවධානයටද ලක්වූ අතර මේ හේතුවෙන් මෙරට පොලිසියට හිමිවන ස්කොට්ලන්ත පුහුණුවද කල් දැමීමට ස්කොට්ලන්තය තීරණය කර තිබුණා.
කෙසේ වෙතත්, වත්මන් වෛද්‍ය පිළිගැනීම් සහ ජීවන චර්‍යාත්මක තෝරා ගැණීම් වලට අනුව සමරිසි, ද්වීරිසි, සංක්‍රාන්ති සමාජභාවී, අන්තර්ලිංගික හා ප්‍රශ්නභාවී (LGBTIQ) ප්‍රජාවන් ට වෙනස්කොට සැලකීම් සිදුනොකළ යුතු බවත් සමලිංගික හැසිරීම් සාපරාදීකරණය කරන දණ්ඩ නීතිසංග්‍රහයේ 365 වැනි වගන්තීන් ඉවත් කළ යුතු බවත් ශ්‍රී ලංකා මනෝවෛද්‍යවරුන්ගේ විද්‍යාලය අවධාරණය කර සිටිනවා.
