මෙරට ක්‍රියාත්මක නිරෝධායන ඇඳිරි නීතිය තවදුරටත් දිර්ඝ කරනවාද නැද්ද යන්න සම්බන්ධ තිරණය හෙට (03) දින ප්‍රකාශයට පත් කිරිමට නියමිත වනවා.
කොවිඩ් මර්දන කාර්ය සාධක බලකායේ විශේෂ රැස්වීමක් ජනාධිපතිවරයාගේ ප්‍රධානත්වයෙන් හෙට පැවැත්වෙන අතර එහිදී මෙම තීරණය ගැනීමට නියමිත බවයි සෞඛ්‍ය සේවා අධ්යක්ෂ ජනරාල් විශේෂඥ වෛද්‍ය අසේල ගුණවර්ධන මහතා පවසන්නේ.
මෙරට ශීඝ්‍ර කොවිඩ් ව්‍යාප්තිය පාලනය කිරීම උදෙසා පසුගිය අගෝස්තු 20වනදා දිවයිනටම බලපැවැත්වෙන පරිදි නිරෝධායන ඇඳිරි නීතිය පණවනු ලැබූ අතර එය අවසන්වීමට නියමිතව ඇත්තේ ලබන සඳුදා (06) අලුයම 04 ටයි.
කෙසේ වෙතත්, විෂයභාර රාජ්‍ය ඇමතිනිය පවසා සිටියේ ඇඳිරි නීතිය තවත් සති දෙකකින් දීර්ඝ කළ යුතු බව තමන්ගේ මතය බවයි.
ඩෙල්ටා ප්‍රභේදයේ ව්‍යාප්තියත් සමඟ රට තුල හඳුනානොගත් කොවිඩ් ආසාදිතයින් 50,000ක් පමණ සමාජයේ සිටිය හැකි බව ශ්‍රී ජයවර්ධනපුර විශ්ව විද්‍යාලයේ ප්‍රතිශක්ති විද්‍යාව හා අණුක වෛද්‍ය විද්‍යාව අංශ ප්‍රධානී සහ ඩෙංගු පර්යේෂණ අංශයේ අධ්යක්ෂ ක්‍ෂුද්‍ර ජීව විද්‍යාව පිළිබඳ මහාචාර්ය නීලිකා මලවිගේ මහත්මිය උපුටා දක්වමින් රාජ්‍ය ඇමතිවරිය පවසා සිටියා.
