ඇෆ්ගනිස්තානයේ ප්‍රධානතම ආදායම් මාර්ගය බවට පත්ව ඇති හෙරොයින් සහ ඔපියම් මත්ද්‍රව්‍ය නිෂ්පාදනය සහ බෙදාහැරීමේ ජාවාරම තලේබාන් පාලනය යටතේ තවදුරටත් වර්ධනය වනු ඇති බවට ප්‍රකාශ වී තිබේ.
ඊපොක් ටයිම්ස් පුවත්පතේ වාර්තාවක දැක්වෙන්නේ, රටේ සහ සංවිධානයේ මුදල් පැවැත්ම තහවුරු කරගෙන ආරක්ෂා කර ගැනීම සදහා මෙම මත්ද්‍රව්‍ය ජාවාරම අඛණ්ඩව පවත්වාගෙන යාමට තලේබාන් සංවිධානය කටයුතු කරනු ඇති බවයි.
මත්ද්‍රව්‍ය සහ අපරාධ පිළිබද එක්සත් ජාතීන්ගේ කාර්යාලයට අනුව ලෝකයේ හොරොයින් සහ ඔපියම් සැපයුමෙන් 80% දායකවන්නේ ඇෆ්ගනිස්තානයයි.
කාබුල් නගරය අත්පත් කරගැනීමෙන් පසුව තලේබාන් සංවිධානය සදහන් කළේ තමන් මෙම මත්ද්‍රව්‍ය ජාවාරම සම්පූර්ණයෙන්ම නවතා දැමීමට පියවර ගන්නා බවයි.
එහෙත් තලේබාන් සංවිධානය දිගින් දිගටම සිය සංවිධානයේ පැවැත්ම වෙනුවෙන් මත්ද්‍රව්‍ය ජාවාරම යොදාගෙන ඇති අතර වාර්ෂිකව ඉන් ලබා ගන්නා ආදායම ඩොලර් මිලියන හාරසියයක් පමණ වන බව ද සදහන් වේ.
මෙම පසුබිම තුළ තලේබාන්වරුන් මෙම මත්ද්‍රව්‍ය ජාවාරම් විවිධ ස්වරූප ඔස්සේ පවත්වාගෙන යාමට කටයුතු කරනු ඇති බව අදාළ වාර්තාවේ වැඩිදුරටත් දැක්වේ.
