බොරතෙල් නිෂ්පාදකයන් අතුරින් ලෝක‍යේ දෙවන ඉහළතම දෛනික නිෂ්පාදනයක් ඇති සෞදි අරාබිය විසින් ආසියානු පාරිභෝගිකයන් සඳහා සියලුම බොරතෙල් මිල ප්‍රමාණයන් අඩුකළ බව නිවේදනය කර සිටිනවා.
කොවිඩ් වසංගතයෙන් සහ, විශේෂයෙන්ම එහි ඩෙල්ටා ප්‍රභේදයෙන් පීඩා විඳීම නිසා දැඩි ආර්ථික අර්බුදයන්ට මුහුණ දීම හේතුවෙන් මෙසේ සැප්තැම්බර් මාසයට සාපේක්ෂව පහළ මිලකට ඉදිරි මාසවලදී තෙල් ලබාදීමට තීරණය කළ බවයි ඔවුන් පවසන්නේ.
මේ අතර ඔපෙක් සංවිධානය සහ ඔවුන්ගේ මිත්‍ර සංවිධානයන් අගෝස්තු සහ දෙසැම්බර් අතර කාලය තුළ දෛනික නිෂ්පාදනයද බොරතෙල් බැරල් 400,000කින් ඉහළ නැංවීමට බලාපොරොත්තු වන බැවින් ගෝලීය තෙල් සැපයුමද ඉහළ යනු ඇති බවයි පැවසෙන්නේ.
කෙසේ වෙතත් දෛනිකව බොරතෙල් බැරල මිලියන 18.6ක් නිපදවන ලොව ඉහළතම බොරතෙල් නිෂ්පාදකයා වන ඇමරිකා එක්සත් ජනපදය හෝ වයඹදිග යුරෝපය සිය මිල ගණන් වල වෙනසක් සිදු කිරීමේ කැමැත්තක් මේ වනතෙක් පලකර නැහැ.
