කෲඩියා සිලෙනිකා ශාකය රතු දත්ත පොතෙන් ඉවත්ව නොමැති බව පරිසර අමාත්‍යංශය පවසනවා.
ඒ අනුව, පණුකරඳ ලෙස දේශීයව හඳුන්වන කෲඩියා සිලෙනිකා ශාකය 2020 රතු දත්ත වාර්තාවෙන් ඉවත් කොට ඇති බවට පලවන මාධ්‍ය වාර්තා සියල්ල ව්‍යාජ සහ අසත්‍ය පුවත් බවයි අමාත්‍යංශය අවධාරණය කර සිටින්නේ.
2012 දී ප්‍රකාශයට පත් කරන ලද රතු දත්ත ලැයිස්තුව, ශ්‍රී ලංකාවෙන් වඳ වී ගිය ශාක පහක් රතු දත්ත ලැයිස්තුවට ඇතුළත් කර ඇති බවත් අධිවේගී මාර්ගය තැනීමේදී විශාල ආන්දෝලනයක් ඇති කළ මෙම ශාකයේ පැළ කිහිපයක් මේ වන විට සොයාගෙන ඇති නමුත් එය 2020 රතු දත්ත වාර්තාවෙන් ඉවත් කොට ඇති බවට පලවන වාර්තා අසත්‍ය බවත් සිදුව ඇත්තේ එය වඳවී ගිය ශාකයක් ලෙස වෙනුවට දැඩි තර්ජනයකට ලක්ව ඇති ශාකයක් ලෙස වර්ගීකරණය කිරීමක් පමණක් බවත් අමාත්‍යංශය පවසනවා.
මෙම රතු දත්ත ලැයිස්තුව සම්පාදනය කර ඇත්තේ ලෝක සංරක්ෂණ සංගමයේ (IUCN) නිර්ණායකයන්ට අනුව බවත් එම නිසා, අපට අවශ්‍ය පරිදි රතු දත්ත ලැයිස්තුව එකතු කිරීමට හෝ ඉවත් කිරීමට නොහැකි බවත් අමාත්‍යාංශය වැඩිදුරටත් පවසනවා.
