ෆේස්බුක් සමාජ මාධ්‍යය තුළ රැකියා දැන්වීම් ප්‍රදර්ශනය කිරීමේදී ෆේස්බුක් සමාගම පුද්ගල සමානාත්මතාවය කඩ කර අති බවට ප්‍රකට ප්‍රචාරක දැන්වීම් ආයතනයක් වන Global Witness ආයතනය කළ සමීක්ෂණයකින් තහවුරු වී තිබෙනවා.
Global Witness ආයතනය පෙන්වා දෙන්නේ ෆේස්බුක් සමාජ මාධ්‍ය තුළ දැන්වීම් ප්‍රචාරය කිරීමේ දී ෆේස්බුක් ආයතනය ලිංගිකත්වය මත වෙනස්කම් කිරීම වැළැක්වීමට අසමත් වූ බවත් ඒවා බලන්නේ කවුරුන්ද යන්න තෝරා ගැනීමේදී ස්වංක්‍රීයව ක්‍රියාත්මක වන ෆේස්බුක් ඇල්ගොරිදමය පක්ෂග්‍රාහීව කටයුතු කර ඇති බවත්ය.
ඔවුන් සිදුකල අත්හදා බැලීමකදී ෆේස්බුක් භාවිත කරන සියල්ලන් අතරින් කාර්මිකයන් සඳහා වූ දැන්වීම් පිරිමි පාර්ශවයටත් දරුවන් රැකබලා ගන්නා හෙදියන් සඳහා වූ දැන්වීම් කාන්තාවන්ට පමණක් පෙන්වීමටත් ෆේස්බුක් සමාජ මාධ්‍ය කටයුතු කර ඇති බව Global Witness ආයතනය පෙන්වා දෙනවා.
මෙම චෝදනාවන්ට පිළිතුරු ලබා දෙමින් ෆේස්බුක් සමාගම පවසන්නේ තම පද්ධතිය මිනිසුන් වඩාත් උනන්දුවක් දැක්වන දේවල් අනුව ඔවුන්ට ෆේස්බුක් සමාජ මාධ්‍ය තුළ දැන්වීම් පෙන්වීමට කටයුතු කරන බවයි.
කෙසේ වෙතත් Global Witness ආයතනය පෙන්වා දෙන මෙම කරුණු ආයතනය තුළ සමාලෝචනය කිරීමට කටයුතු කරමින් සිටින බවද ෆේස්බුක් ආයතන පවසනවා.
