මත්පැන් පානය කිරීම හෝ නොකිරීම කෙනෙක්ගේ පුද්ගලික තීරණයක් බවත් යමෙකුගේ පුද්ගලික රුචිකත්වයන් පාලනය කරන තලේබාන් රටක් බවට ශ්‍රී ලංකාව පත් නොකළ යුතු බවත් ශ්‍රී ලංකා පොදුජන පෙරමුණු බදුල්ල දිස්ත්‍රික් පාර්ලිමේන්තු මන්ත්‍රී ඩිලාන් පෙරේරා මහතා පවසනවා.
පවතින ක්‍රිකට් තරඟාවලි වලදී 6-4 පහරවල් වලට අනතුරුව කාන්තාවන් නර්තනයේ යෙදෙන බැවින් තලේබාන් ඇෆ්ගනිස්ථානය තුල ක්‍රිකට් නැරඹීම තහනම් කළ අයුරින් ශ්‍රී ලංකාව තුල කටයුතු නොකළ යුතු බවයි ඔහු අවධාරණය කර සිටින්නේ.
සුරාසැල් වසා තිබුණද ධනවත් පුද්ගලයන් දිගින් දිගටම විස්කි පානය කළ බවත් සාමාන්‍ය ජනතාවට නීති විරෝධී විෂ මත්පැන් වලට යොමු වීමට සිදුවූ බවත් ඔහු පවසනවා.
“සල්ලි තියෙන එකා ලොක්ඩවුන් තිබුණත් නැතත් විස්කි ටික ගෙදරටම ගෙන්න ගන්නවා. මිනිහා කසිප්පු වලට යන්නෙ නෑනේ. ඒත් අර එදිනෙදා වේල කාලා, කුඹුරු කොටලා යන මිනිහා, ත්‍රීවිල් එක එලවන මිනිහා කසිප්පු වලට යනවා ලොක්ඩවුන් එක කාලෙ.
බාර් ඇරලා රජය කිව්වෙ නෑනේ රටේ ඔක්කොම බාර් වලට පලයන් කියලා. කැමති මිනිහයි බොන්නේ. බොන මිනිහා බොන එක නවත්තන්න බෑ නීති දාලා. මේක තලේබාන් රටක් ද?”යැයි ඔහු පවසනවා.
