ශ්‍රී ලංකාව තුල නව ගල් අඟුරු බලාගාර ඉදි නොකරන බව ජනාධිපති ගෝඨාභය රාජපක්ෂ මහතා පවසනවා.
මේ හරහා, දේශගුණික විපර්යාසයන් පිළිබඳ එක්සත් ජාතීන්ගේ සම්මුතිය සඳහා ශ්‍රී ලංකාව ලබාදෙන දායකත්වය පිළිබිඹු කෙරෙන බවයි ඒ මහතා පවසන්නේ.
ජනාධිපතිවරයා මේ බව සඳහන් කළේ එක්සත් ජාතීන්ගේ බලශක්තිය පිළිබඳ රාජ්‍ය නායක සංවාදයට ඊයේ (24) නිව්යෝර්ක් නුවරදී එක්වෙමින්.
දේශගුණික විපර්යාස හේතුවෙන් පෘථිවියට ඇති වන තර්ජන අවම කර ගැනීමට නම් ගෝලීය වශයෙන් පිරිසිදු බලශක්තිය වෙත යොමුවීම අත්‍යාවශ්‍ය බවයි ජනාධිපතිවරයා පෙන්වා දෙන්නේ. ඒ අනුව, තිරසර බලශක්ති උත්පාදනය හා පරිහරණය වෙනුවෙන් උත්සාහ දරමින් සිටින, දියුණු වෙමින් පවතින ජාතීන්ට සහය වන්නැයි හැකියාව ඇති සියලු රාජ්‍යයන්ගෙන් ජනාධිපතිවරයා ඉල්ලීමක් සිදුකළා.
2030 වන විට රටේ බලශක්ති අවශ්‍යතාවයෙන් 70% ක් පුනර්ජනනීය බලශක්තියෙන් සපුරා ගැනීම මෙරට අරමුණ බවත් පොසිල ඉන්ධනවලින් ක්‍රමානුකූලව ඉවත්වන ශ්‍රී ලංකාව, කාබනීහරණය ප්‍රවර්ධනය කිරීමෙන්, 2050 වන විට කාබන්වලින් නිදහස් රටක් බවට පත් කිරීමට බලාපොරොත්තු වන බවත් ජනාධිපතිවරයා පෙන්වා දෙනවා.
