ත්‍රිකුණාමලයේ නීති විරෝධී ලෙස මෝර මත්ස්‍යයින් දඩයම් කිරීම පිළිබදව ධීවර දෙපාර්තමේන්තුව පරීක්ෂණයක් ආරම්භ කර තිබෙනවා.
Pearl Protectors නම් සමුද්‍ර සංරක්‍ෂණ කණ්ඩායම විසින් ට්විටර් පණිවුඩයක් තබමින් සටහන් කර තිබුණේ ත්‍රිකුණාමලය ප්‍රදේශයේ ධීවරයින් දේශීය මෝර විශේෂයන් දඩයම් කරන බවටයි.
අදාළ ට්විටර් පණිවුඩය මගින් Pearl Protectors සමුද්‍ර සංරක්‍ෂණ කණ්ඩායම පෙන්වා දී තිබුණේ ධීවරයින් වැඩි වැඩියෙන් දේශීය මෝර විශේෂ මරන හෙයින් සාගර ජෛව විවිධත්ව ප්‍රදේශයක්ව පැවති ත්‍රිකුණාමලය ප්‍රදේශය මේ වන විට තර්ජනයට දැන් මුහුණ දී ඇති බවයි.
ඔවුන් පවසන්නේ “මෝරුන් සමඟ ඔබට පිහිනීමට හැකි එකම ස්ථාන නිලාවේලි සහ පරෙවි දූපත්” බවයි.
ඒ අනුව ත්‍රිකුණාමලයේ නීති විරෝධී ලෙස මෝරුන් මසුන් දඩයම් කිරීම පිළිබඳව විසිතුරු මසුන්, මිරිදිය මත්ස්‍ය හා ඉස්සන් ඇති කිරීම, ධීවර වරාය සංවර්ධන, බහුදින ධීවර කටයුතු හා මත්ස්‍ය අපනයන රාජ්‍ය අමාත්‍ය කාංචන විජේසේකර මහතාගේ අවධානය යොමුව තිබෙනවා.
මේ සම්බන්ධයෙන් අදහස් දක්වමින් රාජ්‍ය අමාත්‍යවරයා පවසන්නේ මෙම සිදුවීම සම්බන්ධයෙන් පරීක්ෂණ පැවැත්වීම සඳහා ධීවර දෙපාර්තමේන්තුවේ නිලධාරීන් පිරිසක් ත්‍රිකුණාමලයට පැමිණීමට නියමිත බවයි.
ඒ අනුව මූලික විමර්ශන අවසන් වූ පසු වගකිවයුත්තන්ට එරෙහිව නීතිමය පියවර ගන්නා බව කංචන විජේසේකර මහතා වැඩිදුරටත් සදහන් කරනවා.
