පවතින ආපදා තත්ත්ව‍ය නිසා මියගිය ගණන තවත් ඉහළට

ආපදා තත්ත්වයන් හේතුවෙන් දිවයිනෙන් වාර්තා වන මියගිය පුද්ගලයින්ගේ සංඛ්‍යාව 16ක් දක්වා ඉහළ ගොස් තිබෙනවා.

පුත්තලම, කුරුණෑගල, බදුල්ල, මාතලේ, මුලතිව්, කෑගල්ල සහ ගාල්ල යන ප්‍රදේශවලින් එම මරණ වාර්තා වී ඇති බවත් අයහපත් කාලගුණ තත්ත්වය හේතුවෙන් තවත් එක් පුද්ගලයෙකු අතුරුදන්ව ඇති බවත් ආපදා කළමනාකරණ මධ්‍යස්ථානය පවසනවා. අධික වර්ෂාව හේතුවෙන් මේ වන විට දිස්ත්‍රික්ක 17ක ප්‍රාදේශිය ලේකම් කොට්ඨාස 105කට බලපෑම් එල්ලව ඇති අතර ඉන් පවුල් 8820කට අයත් පුද්ගලයින් 23,638 දෙනෙකු පීඩාවට පත්ව ඇති බව ආපදා කළමනාකරණ මධ්‍යස්ථානය වැඩිදුරටත් පවසනවා.

මේ හේතුවෙන් නිවාස 18ක් සම්පූර්ණයෙන් හානියට පත්ව ඇති අතර තවත් නිවාස 960කට අර්ධ හානි සිදුව තිබේ.

පීඩාවට පත්වූ පවුල් 385ක පුද්ගලයින් 1671 දෙනෙකු සුරක්ෂිත මධ්‍යස්ථාන 19ක මේ වන විට රඳවා ඇති බව ද එම මධ්‍යස්ථානය සඳහන් කළේය.

මේ අතර, දිස්ත්‍රික 11ක් සඳහා නිකුත් කර තිබූ නායයාමේ අවදානම් නිවේදනය අද රාත්‍රි 09.00 දක්වා දීර්ඝ කර තිබේ.