තුන් වන මාත්‍රාව ලබා ගෙන තිබෙන්නේ බොහොම සුළු පිරිසක් බව නියෝජ්‍ය සෞඛ්‍ය අධ්‍යක්ෂ වෛද්‍ය හේමන්ත හේරත් මහතා පවසනවා.
සෞඛ්‍ය මාර්ගෝපදේශ වලට අනුව, කුමන හෝ එන්නතක් ලබාගෙන මාස තුනකට පසුව තුන්වන මාත්‍රාව ලෙස ෆයිසර් එන්නත ලබාගත යුතු බවයි ඔහු පෙන්වා දෙන්නේ.
කිසිඳු එන්නතක් ලබා නොගත් අයගෙන් රෝගය පැතිරීමට ඉඩකඩක් ඇත්තා සේම, සංකූලතා ඇති අය මරණයට පත් වීමේ ප්‍රවණතාවක් පවතින බවත් නැවත රෝගින් වැඩි වීමට ඉඩ නොදී කටයුතු කිරීමට ජනතාව වග බලා ගත යුතු බවත් ඔහු පවසනවා.
ස්පුට්නික් එන්නත ලබා ගත් බොහෝ අය දෙවන මාත්‍රාව ලබාගෙන තිබෙන බවත්, දෙවන මාත්‍රාව ලබා නොගත් අයට පුද්ගල අවශ්‍යතාවය මත එන්නත් ලබාදීමට කටයුතු කරන බවත් නියෝජ්‍ය සෞඛ්‍ය අධ්‍යක්ෂකවරයා පවසා සිටිනවා.
පාසල් දරුවන්ට එන්නත් ලබා දීමේදී දෙමව්පියන්ටත් ලබා ගැනීමට හැකියාව පවතින අතර, පාසල තුළ පිටස්තර පුද්ගලයින් ඒකරාශී වීමට නොහැකි නිසා පාසලට සම්බන්ධ අයට මෙහිදී එන්නත් ලබා ගැනීමට හැකි බවයි වෛද්‍ය හේමන්ත හේරත් පැවසුවේ.
“ලෝකයේ බොහෝ ප්‍රභේද පැතිරිලා ටික කලක් ගියාට පසුව අපේ රටේ පැතුරුණ බවත්, ඒ නිසා ඉදිරියේදී ඕනෑම පුද්ගලයෙකුට මෙම රෝගය වැළඳුණු කෙනෙක් වීමේ හැකියාව පවතින බවත්, මේ හේතුවෙන් පුද්ගල සම්බන්ධතා වලදී ප්‍රවේසම් වීම වැදගත් වනව්වා” යැයි ඔහු පවසනවා.
