වසර 24 කට පසු ඕස්ට්රේලියානු ජාතික ක්‍රිකට් කණ්ඩායම සති හයක සංචාරයක් සදහා පකිස්තානයට පැමිණ සිටින අතර දෙරට අතර වන පළමු ටෙස්ට් තරගය හෙට (මාර්තු 04) රාවල්පිණ්ඩිහිදී ඇරඹීමට නියමිතව තිබේ.
ශ්‍රී ලංකා කණ්ඩායම ගමන්ගත් බස්රථයට 2009 වසරේ ලාහෝර්හි දී ප්‍රහාරයක් එල්ල වීමෙන් පසු ලෝකයේ ක්‍රිකට් කණ්ඩායම් පකිස්තානයේ සංචාරය කිරීම නතර කර තිබූ අතර දශක දෙකකට පසු ඕස්ට්රේලියානු කණ්ඩායමක් පකිස්තානයේ සංචාරයක නිරත වන්නේ ද පකිස්තානය විසින් පූර්ණ ආරක්ෂාව සහතික කිරීමෙන් අනතුරුවය.
ජ්‍යෙෂ්ඨ ක්‍රිකට් ලේඛකයකුවන පීටර් ලාලෝර් ඕස්ට්‍රේලියාව පකිස්තානයේ සංචාරය කිරීම නිර්භීත ක්‍රියාවක් ලෙස පෙනෙන්නට තිබුණද ඕස්ට්‍රේලියා ක්‍රීඩකයන් තුළ භීතිය මුළුමනින්ම පහව ගොස් නැතැයි ප්‍රකාශ කර තිබේ.
කෙසේවෙතත් පකිස්තානය ඕස්ට්රේලියානු ක්‍රීඩකයින්ගේ ආරක්ෂාව දැඩි ලෙස තර කරමින් හමුදා සහ පැරා මිලිටරි භටයින් දහස් ගණනක් ආරක්ෂාව සදහා යොදවා ඇති බව එරට වාර්තා සදහන් කරයි.
හමුදාවට අමතරව අතිරේක පොලිස් භටයින් 4,000 ක් නගරය පුරා ස්ථානගත කර ඇති අතර ක්‍රිකට් ක්‍රීඩාංගණ ආශ්‍රිත සාප්පු සංකීර්ණ සහ වෙලඳපොලවල් වසා දමා, ජංගම සේවාද අත්හිටුවා ක්‍රීඩා කණ්ඩායම් ප්‍රවාහනය කිරීමට පියවර ගෙන ඇති බව එරට මාධ්‍ය වාර්තා පවසයි.
වසා දැමුණු මාර්ගවල සන්නද්ධ බස් රථ නවත්වා ඇති අතර වහළවල් මත ස්නයිපර්වරු රැකවල් ලා සිටින බව ද ඕස්ට්රේලියානු ක්‍රීඩකයින්ගේ ආරක්ෂක විධිවිධාන පිළිබඳ විස්තර කරමින් ලාලෝර් පවසා තිබේ.
