ඉන්ධන ප්‍රවාහන කටයුතුවලින් ඉවත් වෙමින් ලංකා ඛනිජ තෙල් පෞද්ගලික ටැංකි රථ රියදුරන්ගේ සංගමය ඊයේ (30) මධ්‍යම රාත්‍රියේ සිට වර්ජනයක් ආරම්භ කර තිබෙනවා.
ගෙවීම් ඉහළ නංවන ලෙස ඉල්ලමින් මෙම වර්ජනය ආරම්භ කළ බව එම සංගමයේ සම ලේකම් ඩී.වී.ශාන්ත සිල්වා මහතා සදහන් කරනවා.
කෙසේ වෙතත්, ඊයේ රාත්‍රියේ සිය සමාජ මාධ්‍ය ජාල ගිණුම් හරහා පණිවුඩයක් නිකුත් කරමින් බලශක්ති අමාත්‍ය කංචන විජේසේකර කියා සිටියේ, සේවයට වාර්තා නොකරන ඉන්ධන ප්‍රවාහන බලපත්‍රලාභීන්ගේ බලපත්‍ර අහෝසි කිරීමට තීරණය කර ඇති බවයි.
එසේම, ඛනිජ තෙල් තොග ගබඩා පර්යන්ත සමාගමට, වහාම ක්‍රියාත්මක වන පරිදි ඉන්ධන ප්‍රවාහනයට මෙතෙක් බලපත්‍ර ලබා නොදුන් සහ ලබා ගැනීමට නොහැකි වූ නව ප්‍රවාහනකරුවන්ට කඩිනමින් නව බලපත්‍ර ලබාදීමටත් උපදෙස් ලබාදුන් බව අදාළ නිවේදනයේ සදහන් වුණා.
ප්‍රමාණවත් ඔටෝ ඩීසල්, සුපර් ඩීසල්, ඔක්ටේන් 92 වර්ගයේ පෙට්රල් සහ භූමිතෙල් තොග වෙළඳපොලට අඛණ්ඩව නිකුත් කරන අතර, එම ඉන්ධන ප්‍රමාණවත් තොග ඛනිජ තෙල් සංස්ථාව සතුව පවතින බවද අමාත්‍යවරයා සදහන් කරනවා.
කෙසේවෙතත් අමාත්‍යවරයාගේ මෙම නිවේදනය නොතකා ලංකා ඛනිජ තෙල් පෞද්ගලික ටැංකි රථ රියදුරන් මේ වන විටත් වර්ජනයේ නිරත වනවා.
