තමන්ගේ ගිනිගත් නිවාසවලට වන්දි ලබාදීමේ වැඩසටහනක් ක්‍රියාත්මක කළ යුතු බවට ගිනිගත් නිවාසවල හිමිකරුවන් වන පොහොට්ටු මන්ත්‍රීවරුන් ජනාධිපතිවරයාට පවසා තිබෙනවා.
ඒ ශ්‍රී ලංකා පොදුජන පෙරමුණේ පාර්ලිමේ මන්ත්‍රී කණ්ඩායම සහ ජනාධිපති ගෝඨාභය රාජපක්ෂ මහතා අතර ඊයේ (14) ජනාධිපති මන්දිරයෙදී පැවති හමුවේදීයි.
එම රැස්වීමට මන්ත්‍රීවරු 91 දෙනෙකු සහභාගී වී සිටි බව වාර්තා වන අතර සෙසු පිරිස ආරක්ෂක සහ වෙනත් හේතුන් මත රැස්වීමට සහභාගී නොවන බව දැනුම් දුන් බව වාර්තා වනවා.
මෙම රැස්වීම ආරම්භයේදී පසුගියදා ආණ්ඩු පක්ෂයේ මන්ත්‍රීවරුන්ගේ නිවාසවලට එල්ල වූ ප්‍රහාර සම්බන්ධයෙන් උණුසුම්කාරි වාතාවරණයක් ඇතිව තිබෙනවා.
ඒ පොලිස්පතිවරයා ආණ්ඩු පක්ෂයේ මහජන නියෝජිතයින්ගේ ආරක්ෂාව තහවුරු කිරීමට අපොහොසත් වූ බවට චෝදනා කරමින්.
මේ සම්බන්ධයෙන් කරුණු විමසීම සඳහා ජනාධිපතිවරයා විසින් පොලිස්පතිවරයාවද රැස්වීමට කැඳවා තිබෙනවා.
“මෙම සිද්ධිදාමය පටන් ගත් අවස්ථාවේ මම ජනාධිපතිතුමා ළඟ හිටියා. ජනාධිපතිතුමා පොලිස්පතිතුමාට සහ හමුදාපතිතුමාට නියෝග දෙනවා මම දැක්කා. නමුත් ඒ නියෝග ක්‍රියාත්මක වුණේ නැහැ”
යනුවෙන් වෛද්‍ය රමේෂ් පතිරණ මහතා මෙහිදී කියා තිබෙනවා.
පසුව මහාචාර්ය චන්න ජයසුමන පවසා ඇත්තේ,
“මේ ගිනිතියපු සහ පහරදුන් සෑම නිවසකටම අප්‍රේල් 4 සහ 5 දිනවලත් පහරදීම් සහ බලපෑම් සිදුවුණා. ඒ වෙලාවේ අනුරාධපුර මගේ නිවසට පහරදීමට පැමිණි අයගේ ඡායාරූප සහ නම් මම පොලිස්පතිවරයාට ලබාදී තියෙනවා. ඒත් කිසිකෙනෙක් අත්අඩංගුවට ගත්තේ නැහැ. හරිනම් පොලිස්පතිවරයා දැන් ඉල්ලා අස්විය යුතුයි. ඒ වගේම වන්දිදීමේ ක්‍රියාදාමයක් සහ විමර්ශනයක් වහාම ආරම්භ කරන්න කටයුතු කළ යුතුයි.”
මෙහිදී ජනාධිපති නීතීඥ අලි සබ්රි මන්ත්‍රීවරයා සඳහන් කළේ, පවතින නීතිය යටතේ ප්‍රචණ්ඩකාරී හැසිරීමක් පෙන්වූ පුද්ගලයින්ට එරෙහිව නීතිමය ක්‍රියාමාර්ග ගැනීමට යාන්ත්‍රණයක් සකස් කළ හැකි බවයි.
එහිදී පොලිස්පති සී.ඩී වික්‍රමරත්න මහතා පවසා ඇත්තේ නියෝජ්‍ය පොලිස්පතිවරුන් දෙදෙනෙක් යටතේ වහාම මේ සිද්ධි ගැන විමර්ශන ආරම්භ කරන බවයි.
එමෙන්ම සති දෙකක් ඇතුළත පහරදීමේ සිද්ධිවලට සහභාගී වූ සියලුදෙනා අත්අඩංගුවට ගැනීමට කටයුතු කරන බව පොලිස්පතිවරයා සදහන් කරනවා.
මෙහිදී ඩයනා ගමගේ මන්ත්‍රීවරිය සදහන් කර ඇත්තේ හමුදාව ප්‍රචණ්ඩ ක්‍රියා මැඩපැවැත්වීමට මැදිහත් නොවීම සම්බන්ධයෙන් හමුදාපතිවරයාට ද චෝදනා කළ යුතු බවයි.
