හොංකොංහි කතෝලික ප්‍රජාවේ නායක කාදිනල් ජෝසප් සෙන් සෙ-කියුන් අත්අඩංගුවට ගැනීම එම ප්‍රජාව තුළ කම්පනයක් මෙන්ම කනස්සල්ල ද ඇතිකර ඇති බව වාර්තා වේ.
90 හැවිරිදි කාදිනල්වරයා, හිටපු විපක්ෂ නීති සම්පාදකවරියක් වන මාග්‍රට් න්ගාවෝ යී සහ ගායිකාවක් වන ඩෙනිසේ හෝ වෑන් සි පසුගියදා ජාතික ආරක්ෂක පොලිසිය විසින් රඳවා ගනු ලැබුවේ විදේශ බලවේග සමඟ හවුල් වූ බවට චෝදනා කරමිනි.
මෙවැනි දැඩි ක්‍රියාමාර්ගයක් මගින් ආගමික කණ්ඩායම්වලට එරෙහිව කටයුතු කිරීමේ රජයේ අභිලාෂය පෙන්වන බව එරට වාර්තා කියයි.
මෙම පියවර ආගමට වඩා දේශපාලනය කේන්ද්‍ර කරගත් බවද එම වි‍ශ්ලේෂකයෝ පවසති.
මෙම අත්අඩංගුවට ගැනීම්, 2020 ජූනි මාසයේදී නගරය මත පනවන ලද මතභේදාත්මක ජාතික ආරක්ෂක නීතිය බලාත්මක කිරීමේ බලධාරීන්ගේ නවතම පියවරක් බවට ද චෝදනා එල්ල වී තිබේ.
මේ අතර හොංකොං ජාතික ආරක්ෂක පොලිසිය විසින් ආසියාවේ ජ්‍යෙෂ්ඨතම කතෝලික පූජකවරයෙකු වන ජෝසප් සෙන් අත්අඩංගුවට ගැනීම පිළිබඳව වතිකානුවද සිය කනස්සල්ල පළ කර තිබේ.
