එක්සත් ජනපද ජනාධිපති ජෝ බයිඩන් ජූලි 13 සිට 16 දක්වා බටහිර ආසියාවේ රටවල තෙදින සංචාරයක නිරත වන අතර එහිදී ඉන්දීය අගමැති නරේන්ද්‍ර මෝදි, ඊශ්‍රායල අගමැති නෆ්තාලි බෙනට් සහ එක්සත් අරාබි එමීර් රාජ්‍යයේ ජනාධිපති මොහොමඩ් බින් සයීඩ් අල් නහියන් අතර අතථ්‍ය සමුළුවක් පැවැත්වීමට ද නියමිත බව වාර්තා වේ.
එක්සත් ජනපද පරිපාලනයේ ජ්‍යෙෂ්ඨ නිලධාරියෙක් විදෙස් මාධ්‍ය වෙත පැවසුවේ ඉන්දියාව සහ ඊශ්‍රායලය සඳහා “I”, එක්සත් ජනපදය සහ එක්සත් අරාබි එමීර් රාජ්‍යය සඳහා “U” ලෙස නව කණ්ඩායම “I2U2” ලෙස හඳුන්වනු ඇති බවයි.
එක්සත් අරාබි එමීර් රාජ්‍යය, මොරොක්කෝව සහ බහරේනය සමඟ ඇති කර ගත් ඒබ්‍රහම් ගිවිසුම් හරහා ඊශ්‍රායලය කලාපයට වැඩි වැඩියෙන් ඒකාබද්ධ වීම කෙරෙහි මෙම සංචාරයේ දී අවධානය යොමු වනු ඇතැයි සඳහන් වේ.
පසුගිය ඔක්තෝම්බර් මාසයේදී ඉන්දීය විදේශ කටයුතු අමාත්‍ය එස් ජයශංකර් ඊශ්‍රායලයට ගොස් සිටියදී ද රටවල් හතරේ විදේශ අමාත්‍යවරුන්ගේ රැස්වීමක් පැවැත්විණි.
එකල එය හැඳින්වූයේ ‘ආර්ථික සහයෝගීතාව සඳහා වූ ජාත්‍යන්තර සංසදය’ යනුවෙන් වන අතර මෙවර රැස්වීම රාජ්‍ය ප්‍රධානීන්ගේ මට්ටමින් සිදුවනු ඇතැයි ආරංචි මාර්ග පවසයි.
