ශ්‍රී ලංකාවේ ඇතිවී ඇති ආර්ථික අර්බුදය එක් රැයකින් විසඳා ගැනීමට නොහැකි බව මෙරට චීන තානාපති කී ෂෙන්හොං (H.E. Qi Zhenhong) පවසනවා.
ඒ, ඊයේ (28) මල්වතු අස්ගිරි මහ නාහිමිවරුන් ද බැහැදැකීමෙන් අනතුරුව මාධ්‍ය වෙත අදහස් දක්වමින්.
මහනුවරට පැමිණි චීන තානාපතිවරයා ඊයේ (27) පස්වරුවේ අස්ගිරි මහා විහාර පාර්ශවයේදී අස්ගිරි පාර්ශවයේ මහා නායක අතිපූජ්‍ය වරකාගොඩ ඤාණරතන හිමියන් බැහැ දුටු අතර මල්වතු මහා විහාරයේදී මහා නායක අතිපූජ්‍ය තිබ්බටුවාවේ ශ්‍රී සිද්ධාර්ථ සුමංගල හිමියන් බැහැ දැක ආශිර්වාද ලබා ගත්තේය.
කෙසේ නමුත් මෙරට ආර්ථික අර්බුදයෙන් මුදවා ගැනීම සඳහා චීන රජයේ සහයෝගය අඛණ්ඩ හිමිවන බවයි ඔහු පවසන්නේ.
“චීන රජයේ සහයෝගිතා ආධාර ප්‍රදානයට අමතරව චීන බෞද්ධ සංගමය මගින් මෙරට විහාරස්ථාන හා බුදු දහමේ පුනර්ජීවනය උදෙසා ආධාර ලබාදීමේ වැඩපිළිවෙළක් සැලසුම් කොට තිබෙනවා .
ශ්‍රී ලංකාව තුළ විවිධ වෙනස්කම් සිදු වුවත් ශ්‍රී ලංකා චීන මිත්‍රත්වය තුළ කිසිදු වෙනස්වීමක් සිදු වූයේ නැහැ. දෙරට අතර දී ද්විපාක්ෂික සම්බන්ධතා අඛණ්ඩව පවත්වා ගැනීම චීන රජයේ අරමුණයි . පවතින අසීරු තත්ත්වයෙන් මිදීමට ශ්‍රී ලංකාවට හැකියාව තිබෙන බව අපගේ විශ්වාසයයි . එය සඳහා චීන රජයේ නොමද සහය පළ කරනවා” යැයි තානාපති වරයා වැඩිදුරටත් පවසනවා.
මහනුවර චන්දානන්ද බෞද්ධ විදුහලේ විදුහල්පති ශ්‍රාස්ත්‍රපති පූජ්‍ය ගොඩගම ධම්මකිත්ති හිමියන් ද මෙම අවස්ථාවට එක් විය.
