ලබන වසරේ ජනවාරි මස සිට අඛණ්ඩව විදුලිය සැපයීම සඳහා සිදු කළ හැකි සෑම පියවරක්ම ගන්නා බව විදුලිබල හා බලශක්ති අමාත්‍ය කංචන විජේසේකර මහතා පවසනවා.
අමාත්‍යවරයා මේ බව ප්‍රකාශ කර ඇත්තේ ෂිංහුවා පුවත් සේවය සමඟ පැවැත්වූ සම්මුඛ සාකච්ඡාවකදීයි.
පසුගිය මාස කිහිපය තුළදී විදුලි කප්පාදුව විශාල ලෙස අඩු කිරීමට පියවර ගත් බවයි ඔහු එහිදී පෙන්වා දී ඇත්තේ.
අමාත්‍යවරයා ප්‍රකාශ කර ඇත්තේ අඛණ්ඩව විදුලි සැපයුමක් ලබා දීමට නම් විදුලි ගාස්තු සංශෝධනය කළ යුතු බවයි.
එවැනි සංශෝධනයක් කිරීමට නම් සෑම වසරක ජනවාරි සහ ජුනි මාසවලදී විදුලි බිල සංශෝධනය කිරීම වඩාත් සුදුසු බව එම සම්මුඛ සාකච්ඡාවේ දී ඒ මහතා පෙන්වා දී තිබෙනවා.
වැඩිදුරටත් අදහස් දක්වමින් අමාත්‍යවරයා ප්‍රකාශ කර ඇත්තේ 2023 වසරේ දී පුනර්ජනනීය බලශක්තිය ඉහළ දැමීමට බලාපොරොත්තු වන බවයි.
කෙසේ වෙතත් මේ වසරේ පෙබරවාරි මාසයේ සිට දෛනික විදුලි කප්පාදුවක් සිදුවන අතර එක් අවස්ථාවක එම විදුලි කප්පාදුව පැය 13 දක්වා වර්ධනය වුණා.
නමුත් මේ වන විට එම විදුලි කප්පාදුව පැය දෙකකට සීමා වී තිබෙනවා.
මේ අතර එළඹෙන දින දෙකේදී දෛනික විදුලි කප්පාදුව පැය 2යි විනාඩි 20 දක්වා ඉහළ දැමීමට මහජන උපයෝගිතා කොමිසම අවසර ලබා දී තිබෙනවා.
ඒ අනුව දිවා කාලයේ පැය කාලයක් සහ රාත්‍රී කාලයේ පැයයි විනාඩි 20ක කාලයක් විදුලි කප්පාදුව සිදු කෙරෙනු ඇති.
