ජනාධිපති රනිල් වික්‍රමසිංහගේ ඉල්ලීමක් මත පැවැත්වෙන ජනරජ පෙරහර අද (19) පස්වරුවේ අති උත්කර්ෂවත් අන්දමින් මහනුවරදී වීදි සංචාරය කිරීමට නියමිතයි.
පෙරහැර පස්වරු 06.30 ට මහනුවර ශ්‍රී දළදා මාළිගයේ සිට වීදි සංචාරය ආරම්භ කිරීමට නියමිත අතර එය දළදා වීදිය, යටිනුවර විදීය සහ රජ වීදිය ඔස්සේ ගමන් කිරීමට කටයුතු සංවිධානය කර තිබෙනවා.
මෙම පෙරහැර සඳහා අලි ඇතුන් 60 කට ආසන්න ප්‍රමාණයක් සහභාගී කරවමින් ඇසළ පෙරහර මංගල්‍යයේ අවසන් රන්දෝල් පෙරහර පැවැත්වෙන ආකාරයෙන්නම විචිත්‍රව හා උත්කර්ෂවත්ව පැවැත්වෙනු ඇති.
ජනරජ දිනය වෙනුවෙන් අද දිනය පුරා පැවැත්වෙන උත්සව මාලාවට සහභාගීවීමට රජයේ කැබිනට් අමාත්‍යවරුන්, අමාත්‍යාංශ ලේකම්වරු ඇතුළු පිරිසක් ඊයේ රාත්‍රියේ සිට කොළඹ සිට නුවරට පැමිණ සිටිනවා.
පෙරහර අවස්ථාවට ඇමතිවරු, රාජ්‍ය ඇමතිවරු, තානාපතිවරුන්, මහ කොමසාරිස්වරුන් ඇතුළු සම්භාවනීය අමුත්තන් විශාල ප්‍රමාණයක් සහභාගීවීමට නියමිතයි.
ජනරජ පෙරහර වෙනුවෙන් ශ්‍රී ලංකා පොලිසිය විශේෂ ආරක්ෂක සහ රථවාහන වැඩපිළිවෙළක් මහනුවර නගරය පුරා සංවිධානය කර තිබෙනවා.
පෙරහර මංගල්‍යය ඇතුළු අද පැවැත්වෙන ජනරජ දින උත්සව සඳහා වන සමස්ත පිරිවැය කෝටි 10 කට ආසන්න වනු ඇතැයි වාර්තා වනවා.
වත්මන් රජය මේආකාරයෙන් පෙරහැර පවත්වන්නේ මුදල් නොමැති බව පවසා මෙරට හදිසි සැත්කම් හැර අත්‍යවශ්‍ය නොවන සැත්කම් නවතා ඇති මොහොතකයි.
එමෙන්ම ඡන්දය පැවැත්වීමටද මුදල් නොමැති බව පවසන ආණ්ඩුව උසස් පෙළ පැවති සමයේ සිසුන්ට අඛණ්ඩ විදුලිය ලබා නොදුන්නේද මුදල් නොනමැති බව පවසමින්.
