ප්‍රවීන බොලිවුඩ් චිත්‍රපට අධ්‍යක්ෂක සංජය ලීලා බන්සාලි හට ඉන්දීය අධිකරණයෙන් සිතාසි නිකුත් කර ඇත.
ඒ ඔහුගේ නවතම චිත්‍රපටය වන ආලියා බාත් රංගනයෙන් දායක වන ‘Gangubai Kathiawad’ චිත්‍රපටය සම්බන්ධවයි.
ඉන්දියාවේ සිටි අඩු වයසින් ගණිකා වෘත්තියේ නියැලුණු Gangubai නම් කාන්තාවගේ ජීවිත කතාව පාදක කරගනිමින් රචනා වී ඇති ‘Mafia Queens of Mumbai’ඇසුරෙන් නිර්මාණය කල Gangubai Kathiawadi චිත්‍රපටයේ අධ්‍යක්ෂක සංජය ලීලා බන්සාලිට, නවකතාවේ රචකයා වු හුසේන් සයිදිට, බන්සාලි නිෂ්පාදන සමාගමට හා චිත්‍රපටයේ ප්‍රධාන චරිතයට රංගනයෙන් දායක වන ආලියා බාත් හට මෙසේ සිතාසි නිකුත් කර ඇත.
කතාව හා චිත්‍රපටය සඳහා පාදක වූ සැබෑ ගංගුබායිගේ පුතෙක් වන 74 වියැති බාබුජි රවුජි ෂාහ් විසින් මොවුන්ට විරුද්ධව පසුගිය දෙසැම්බර් මාසයේදි නඩු පවරා ඇත්තේ ඔහුගේ මව ගණිකාවක් ලෙස අදාල කෘතියේ හා චිත්‍රපටයේ හදුන්වා ඇති බව පවසමින්.
තවදුරටත් ඔහු පවසන්නේ අදාල කෘතියේ හා චිත්‍රපටයේ ඔහුගේ මව ගණිකා ජාවාරමේ නියැලීම හා මාෆියා රැජිණක් ලෙස හදුන්වා තිබීම ඇයටත් තම පවුලටත් සිදුකර ඇති අපහාසයක් ලෙසයි.
නවකතාව ප්‍රකාශයට පත් වු බවක් ඔහු නොදන්නා බවත් චිත්‍රපටය ගැන ආරාංචි සමාජ මාධ්‍ය ජාලා හරහා ප්‍රසිද්ධවීමත් සමඟ මේ පිළිබදව දැනගත් බවත් ඔහු පවසා ඇත.
ඔහුගේ මව එනම්, මේ කතාව හා චිත්‍රපටයට පාදක වු ගංගුබායි සැබෑවටම ගණිකාවන් වැනි ලිංගික සේවා සපයන අයවලුන්ගේ අයිතිවාසිකම් වෙනුවෙන් මෙන්ම මිනිස් ජාවාරම් වෙනුවෙන්ද පෙනී සිටි අයෙක් වූවා මිස ගණිකාවක් නොවන බව ඔහු පවසා ඇත.
චිත්‍රපටයේ පූර්ව ප්‍රචාරක පටය නිකුත් වූවායින් පසුව තම දියණියගෙන් හා ලේලිගෙන් නාදුනන මිනිසුන් මිල ගණන් හා අනිසි බලපෑම් සඳහා යෝජනා ගෙන එන බවත් ඔහු පවසා ඇති අතර නවකතාව ප්‍රකාශයට පත් කිරීමට පෙර ඔහුව දැන්වත් කිරීමක් හෝ අවසර ගැනීමක් සිදු නොකල බවත් බාබුජි රවුජි ෂාහ් විසින් අධිකරණ හමුවේ පවසා තිබේ.
සංජය ලීලා බන්සාලි යොවුන් නිළි ආලියා බාත් සමඟ සිදුකල ප්‍රථම සිනමාපටය වු Gangubai Kathiawadi චිත්‍රපටය මේ වසරේ ජුලි 30 නිකුත්වීමට ඇති අතර අධිකරණ විසින් සිතාසි නිකුත් කර ඇත්තේ මැයි 21 වන විට අධිකරණට හමුවේ පෙනී සිටින ලෙසයි.
-අනුෂ්ක රසාංජන ද සිල්වා-
