ඇෆ්ගනිස්ථානයට ආහාර සහ කොවිඩ්-19 එන්නත් ඇතුළු යුවාන් මිලියන 200 ක් (ඩොලර් මිලියන 31 ක්) වටිනා ආධාර ලබා දෙන බවට චීනය පොරොන්දු වී තිබේ.
තලේබාන් රජය සමඟ සම්බන්ධතා පවත්වා ගෙන යාමට චීනයේ කැමැත්ත ප්‍රකාශ වීමෙන් අනතුරුව මෙම ආධාර ලබා දීමට කටයුතු කර ඇතැයි විදෙස් මාධ්‍ය වාර්තා කරයි.
ඇෆ්ගනිස්ථානයේ සාමය යථා තත්ත්වයට පත් කිරීම සඳහා නව අන්තර්වාර රජය පිහිටුවීම අවශ්‍ය බව චීනය ප්‍රකාශ කර තිබේ.
තලේබාන් සංවිධානයේ තාවකාලික කැබිනට් මණ්ඩලය පසුගිය සතියේ නිවේදනය කරන ලද අතර, එම රට “ඉස්ලාමීය එමිරේට්” ලෙස ප්‍රකාශයට පත් කරන ලදී.
ඇමරිකාව තලේබාන් රජයක් පිළිගැනීම තව බොහෝ දුරින් බවතින කරුණක් යැයි ඇමරිකානු ජනාධිපති ජෝ බයිඩන් ප්‍රකාශ කරද්දී චීනය ඇෆ්ගනිස්ථානය වෙත කරන මැදිහත්වීම ඉක්මන් කිරීමේ පියවරක් ලෙස මෙම ආධාර ලබාදීම කඩිනම් කර ඇතැයි සඳහන් වේ.
ඇෆ්ගනිස්ථානයේ අසල්වැසියන් වන පාකිස්තානය, ඉරානය, තජිකිස්තානය, උස්බෙකිස්තානය සහ තුර්ක්මෙනිස්ථානය යන රටවල් සමඟ බදාදා පැවති හමුවකදී චීන විදේශ ඇමති වැන්ග් යි ඇෆ්ගනිස්ථානය සඳහා ආධාර ලබා දීම නිවේදනය කළේය.
ඇෆ්ගනිස්ථානයට උදව් කිරීම සඳහා සහයෝගයෙන් කටයුතු කරන ලෙස ඔහු මෙම රටවලින් ඉල්ලා සිටි අතර චීනය ද ඒ සඳහා එන්නත් මිලියන 3 ක් ලබා දෙන බව පවසන ලදී
