ජීවිතාන්තය දක්වා සිරදඬුවම් ලබා සිටි දුමින්ද සිල්වා ජනාධිපති සමාවෙන් නිදහස් වූ නමුත් එම සමාව අත්හිටුවීමට ඊයේ දින ශ්‍රේෂ්ඨාධිකරණය නියෝග කිරීමෙන් අනතුරුව දුමින්ද සිල්වා අත්අඩංගුවට ගෙන තිබෙනවා.
ඒ, ශ්‍රී ජයවර්ධනපුර රෝහලේ සිටියදීයි.
පසුගිය දිනවල විදෙස් ගතව සිටි ඔහු මීට දින කිහිපයකට පෙර යළි දිවයිනට පැමිණ ඇති අතර අනතුරුව ඔහු සුපුරුදු ලෙස ශ්‍රී ජයවර්ධනපුර රෝහලට ඇතුලත් වී තිබෙනවා.
වලිප්පුව හෙවත් අපස්මාර රෝගී තත්වයක් හේතුවෙන් ඔහු රෝහල්ගත කර ඇති බවයි රෝහල් ආරංචි මාර්ග පැවසුවේ.
කෙසේ වෙතත් ඊයේ දින ශ්‍රේෂ්ඨාධිකරණ ලබා දුන් තීන්දුවෙන් පසු නීතිපතිවරයා ද පොලිස්පතිවරයා වෙත ලිඛිතව දැනුම් දී තිබුණේ වහාම දුමින්ද සිල්වාව අත්අඩංගුවට ගන්න ලෙසයි.
දුමින්ද සිල්වා වෙත ලබා දුන් ජනාධිපති සමාව අභියෝගයට ලක්කරමින් හිටපු පාර්ලිමේන්තු මන්ත්‍රිනී හිරුණිකා ප්‍රේමචන්ද්‍ර ගොණු කළ මූලික අයිතිවාසිකම් පෙත්සම විභාගයට ගනිමිනුයි ශ්‍රේෂ්ඨාධිකරණය උක්ත තීන්දුව ලබා දුන්නේ.
ඒ අනුව, එම නඩු විභාගය අවසන් වන තෙක් දුමින්ද සිල්වා වෙත ලබා දී තිබූ දඬුවම යළි ක්‍රියාත්මක වනු ලබයි.
