වත්මන් ජනාධිපති ගෝඨාභය රාජපක්ෂ මහතාට විරුද්ධ වන බොහෝ දේශපාලඥයන් හට ජනාධිපතිවරයා විසින් අමාත්‍ය තනතුරක් ලබා දීමට කටයුතු කළහොත් ඔවුන් ජනාධිපතිවරයා සමඟ එක්වනු ඇති බව පාර්ලිමේන්තු මන්ත්‍රී, ෆීල්ඩ් මාර්ෂල් සරත් ෆොන්සේකා මහතා පවසනවා.
ඒ, යූටියුබ් නාලිකාවක් සමඟ සංවාදයකට එක් වෙමින්.
බොහෝ දේශපාලඥයන් හට ඇත්තේ රට සම්බන්ධ දැක්මක් නොව පුද්ගලික න්‍යාය පත්‍රයක් බවයි සරත් ෆොන්සේකා මහතා පෙන්වා දෙන්නේ.
එබැවින්, බහුතරයක් සහිත ආණ්ඩුවකට එරෙහිව විශ්වාස භංගයක් ගෙන ඒම වෙනුවට ජනතා විරෝධයක් හරහා බලය හුවමාරුවක් සිදුවිය යුතු බව තමා විශ්වාස කළද එය සිදුවිය යුත්තේ ප්‍රජාතන්ත්‍රවාදීව මැතිවරණ හරහා මිස කෝලහාල හරහා නොවන බවත් එවැනි බල හුවමාරු අස්ථාවර බවට ලෝක උදාහරණ ඇති බවත් ඔහු පෙන්වා දෙනවා.
ගෝඨාභය රාජපක්ෂ යනු අසාර්ථක දේශපාලඥයෙකු බවට මේ වන විට සනාථව ඇති අතර රටක් වෙනස් කිරීමට හැක්කේ විශිෂ්ඨ නායකයන්ට පමණක් බවත් ඔහු පෙන්වා දෙනවා.
එමෙන්ම, මෛත්‍රීපාල සිරිසේන සමග හෝ රනිල් වික්‍රමසිංහ සමඟ ගොඩ නගන දේශපාලන එකමුතුවකට තමා කිසි ලෙසකත් සම්බන්ධ නොවන බවත් ඔහු අවධාරණය කර සිටිනවා.
