තමන් ජනාධිපති ධූරයට පත්වුවහොත් එක් වේලක් කා අසරණව සිටින ජනතාව තවදුරටත් අසරණ නොකර ඔවුන්ට හොදින් කෑමට බීමට අවශ්‍ය පරිසරය සකසන බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රි ගීතා කුමාරසිංහ මහත්මිය පවසනවා.
Youtube නාලිකාවක් සමඟ පැවති සම්මුඛ සාකච්ඡාවකට එක්වෙමින් ඇය සඳහන් කළේ සියලු දෙනාටම එක රටක් එක නීතියක් ක්‍රියාත්මක විය යුතු බවත් තමන් ජනාධිපති වුවහොත් එය ක්‍රියාවෙන් සිදුකර පෙන්වන බවත්ය.
විමල් වීරවංශ මහතා යනු තමන් ඉතාමත්ම කැමති දේශපාලඥයෙක් වන අතර වරෙක ඔහු තමන් පිළිබදව සිදුකළ කතාවක් හේතුවෙන් තමන් පාර්ලිමේන්තුවේදී පැය භාගයකට ආසන්න කාලයක් හඩා වැටුණු බවද ගීතා කුමාරසිංහ මහත්මිය මෙම සම්මුඛ සාකච්ඡාවේදී අදහස් පලකරනවා.
2015 දී මහින්ද රාජපක්ෂ මහතා ජනාධිපතිවරණයෙන් පරාජයට පත්වූ පසුව මෛත්‍රිපාල සිරිසේන මහතා තමන්ට ආණ්ඩුව සමඟ එක්වන්නැයි ආරාධනා කළ අවස්ථාවේදී තමන් එය ප්‍රතික්ෂේප කලද පවිත්‍රා වන්නිආරච්චි මහත්මිය යහපාලන ආණ්ඩුව සමග එක්වී ඇමති තනතුරක් ලබාගත් බවද ඇය මෙහිදී සිහිපත් කළා.
සජිත් ප්‍රේමදාස මහතා යනු තමන් කැමති පුද්ගලයෙකු බවත් ඔහුගේ විවාහ උත්සවයට පවා තමන් සහභාගී වූ බවත් ගීතා කුමාරසිංහ මහත්මිය මෙම වැඩසටහනේදී ඇයගේ මතකය අවදිකරනවා.
