වයස අවුරුදු 15 ක දැරියක් මාස 9 ක් පුරාවට නැවත නැවතත් සමූහ දූෂණයට ලක් කිරීමේ සිද්ධියක් සම්බන්ධයෙන් ඉන්දියාවේ බලධාරීන් පරීක්ෂණ පවත්වන බව එරට මාධ්‍ය වාර්තා කරනවා.
ජනවාරි මාසයේ සිට සිදුවූ බව කියන මෙම සමූහ දූෂණය සම්බන්ධයෙන් මුම්බායි නගරයේ පුද්ගලයින් 28 දෙනෙකු මේ වන විට අත්අඩංගුවට ගෙන තිබෙනවා.
මෙම සමූහ දූෂණය ආරම්භ වී ඇත්තේ එම 15 හැවිරිදි තරුණියගේ පෙම්වතා විසින් ඇයව දූෂණය කර එම සිදුවීම රූගත කළ සිදුවීමකින් පසුව බව ඉන්දීය මාධ්‍ය වාර්තා කරනවා.
පසුව ඔහු සහ ඔහුගේ මිතුරන් එම පටිගත කළ දර්ශන භාවිතා කර ඇයට තර්ජනය කරමින් බලහත්කාරයෙන් ඇය සමඟ ලිංගික සම්බන්ධකම් පවත්වා ඇති බවයි.
ඒ අනුව අදාළ දර්ශන ප්‍රසිද්ධ කරන බවට තර්ජනය කර මුම්බායි හි තදාසන්න ප්‍රදේශ වන දොම්බිවිලි, බද්ලාපූර්, මුර්බාද් සහ රබාලේ යන ප්‍රදේශවලදී වරින් වර මාස 09 ක් පුරාවටම ඇයව සමූහ දූෂණයට ලක්කර තිබෙනවා.
කෙසේ වෙතත් පසුගිය බදාදා ඇය මෙම අපචාරය පිළිබදව පොලීසියට පැමිණිලි කර ඇති බව වාර්තා වනවා.
NDTV පුවත් සේවය වාර්තා කරන්නේ දූෂකයින් 33 දෙනෙකුගේ නම් ඇය පැමිණිල්ලේ සදහන් කර ඇති බවත් ඔවුන් සියලු දෙනාම තමන්ට හදුනාගත හැකි බවත්ය.
ඉන්දියාවේ තරුණියන් සම්බන්ධයෙන් සිදුවන සමූහ දූෂණ සිදුවීම් සුළභව වාර්තා වනවාත
2012 වසරේදී නිර්භයා ලෙසින් හැඳින්වූ තරුණියක් සමූහ දූෂණයට ලක්කිරීමේ කුප්‍රකට සිදුවීම නිසා එරට සමූහ දූෂණ සම්බන්ධ සිදුවීම් පිළිබදව දැඩි කතාබහකට ලක්වූ අතර එය අන්තර්ජාතික වශයෙන්ද ඉන්දියාවට එල්ල වූ කළු පැල්ලමක් වූවා.
එම සිදුවීමෙන් පසුව ලිංගික අපරාධ සම්බන්ධයෙන් ඉන්දියාව නවනීති හදුන්වා දුන්නද සමූහ දූෂණ සහ ස්ත්‍රී දූෂණ මේ වන විටත් අඩුවකින් තොරව ඉන්දියාවෙන් වාර්තා වනවා.
2020 වසරේදී ඉන්දියාවේ ජාතික අපරාධ වාර්තා කාර්යාංශය විසින් එරට ස්ත්‍රී දූෂණ 28,046 ක් වාර්තා කළ අතර එය දිනකට ස්ත්‍රී දූෂණ 77 ක් බවට ගණන් බලා තිබෙනවා.
කෙසේ වෙතත් ඉන්දියානු සමාජය තුළ කාන්තාවන් බොහෝමයක් විවිධ පෞද්ගලික හා සමාජ කාරණා නිසා තමන්ට එරෙහිව සිදුවන කායික අපරාධ සම්බන්ධයෙන් නීතිය ඉදිරියට නොපැමිණෙන ප්‍රවණතාවයක් පවතින බැවින් මෙම ස්ත්‍රී දූෂණ සංඛ්‍යාව සත්‍ය සංඛ්‍යාවට වඩා ඉහළ අගයක් ගන්නා බවට එරට කාන්තා සංවිධාන පවසනවා.
