නඳුන් චින්තක හෙවත් හරක් කටාගේ මස්සිනා වන ගයාන් ධනුෂ්ක නම් පුද්ගලයාට අයත් රුපියල් කෝටි එකහමාරක පමණ වටිනාකමකින් යුත් ඉඩමක් නීතිවිරෝධී වත්කම් විමර්ශන ඒකකය මගින් තහනම් කර තිබෙනවා.
ඔහුගේ දේපළ සම්බන්ධයෙන් නීතිවිරෝධී වත්කම් විමර්ශන ඒකකය මගින් විමර්ශන සිදුකර තිබෙන අතර එහිදී අනාවරණ වී ඇත්තේ, නුගේගොඩ පිහිටි රුපියල් කෝටි එකහමාරක පමණ ඉඩමක් ඔහු සතුව ඇති බවයි.
ඒ අනුව සැකකරු අත්අඩංගුවට ගෙන සිදුකළ විමර්ශනයෙන් පසුව අදාළ ඉඩම තහනම් කර තිබෙනවා.
ඒ අතරතුරදී ඔහුට ඇප ලැබීම හේතුවෙන් සැකකරු ජපානයට පළාගොස් තිබෙන අතර සිද්ධිය සම්බන්ධයෙන් වැඩිදුර විමර්ශන ක්‍රියාත්මක වන බවට වාර්තා වනවා.
මේ අතර වෙලේ සුදාගේ සමීපතමයන් දෙදෙනෙකුට අධිකරණය වසර 7ක බරපතළ වැඩ සහිත සිරදඬුවම් නියම කර තිබෙනවා.
ඒ මත්ද්‍රව්‍ය ජාවාරමෙන් සහ නීතිවිරෝධීව උපයාගත් මුදලින් ලබාගත් සුඛෝපබෝගී වෑන් රථ දෙකක් සම්බන්ධයෙන් සිදුකළ විමර්ශනයකින් අනතුරුවයි.
පසුව එම සුඛෝපභෝගී වෑන් රථ දෙකද ඊයේ (23) අධිකරණය මගින් රාජසන්තක කර තිබුණා.
