අද (22) පැවති කැබිනට් තීරණ දැනුම්දීමේ ප්‍රවෘත්ති සාකච්ඡාවේදී එම සාකච්ඡාව මෙහෙයවූ රජයේ ප්‍රවෘත්ති දෙපාර්තමේන්තුවේ අතිරේක අධ්‍යක්ෂ ජනරාල් මිලින්ද රාජපක්ෂ මහතාට මාධ්‍යවේදීන් කිහිප දෙනෙකුගෙන්ම විරෝධය එල්ල වුණා.
ඒ කැබිනට් ප්‍රවෘත්ති සාකච්ඡාව මෙහෙයවීමේ සම්ප්‍රදායික ක්‍රමවේදයෙන් බැහැරව අන්තනෝමතික ආකාරයෙන් කටයුතු කිරීම හේතුවෙන්.
කොවිඩ් වසංගත තත්ත්වය හේතුවෙන් Zoom යෙදුම ආධාරයෙන් සතිපතා පැවැත්වෙන කැබිනට් තීරණ දැනුම්දීමේ ප්‍රවෘත්ති සාකච්ඡාවේදී ප්‍රශ්න ඇසීමට මාධ්‍යවේදීන් සලකුණු කරන පිළිවෙලෙහි අනුපිළිවෙල මත එම ප්‍රශ්න කැබිනට් මාධ්‍ය ප්‍රකාශකවරයාට යොමුකරනවා.
මාධ්‍යවේදීන් චෝදනා කරන්නේ මෙම සම්මත ක්‍රමවේදයෙන් බැහැරව මිලින්ද රාජපක්ෂ මහතා මීට පෙර සතියේත් අද දිනයේත් ක්‍රියාකල බවයි.
මීට පෙර එම ප්‍රවෘත්ති සාකච්ඡාව රජයේ ප්‍රවෘත්ති අධ්‍යක්ෂ ජනරාල් මොහාන් සමරනායක මහතා මෙහෙයවූවද මේ දිනවල ඔහු අසනීප තත්ත්වයෙන් පසුවනවා.
News24 ආයතනයේ අසංක අතපත්තු මහතා සහ LankaENews ආයතනයේ අතුල ඇතුළත්මුදලි මහතා මිලින්ද රාජපක්ෂ මහතාගේ අද ක්‍රියාකලාපය නිසා අපහසුතාවයට පත්ව සිටියා.
මේ අතර MediaLK ආයතනයේ මාධ්‍යවේදී තරිදු ජයවර්ධන මහතා සිය ෆේස්බුක් ගිණුමේ සටහනක් තබමින් මිලින්ද රාජපක්ෂ මහතාට විරෝධය පලකර සිටිනවා.
ඔහු සදහන් කරන්නේ ඉන්ධන අර්බුදය සම්බන්ධයෙන් තමන් ප්‍රශ්න දෙකක් ඇසීමට සූදානමින් සිටියදී මිලින්ද රාජපක්ෂ මහතා මයික්‍රෆෝනය ක්‍රියාවිරහිත කළ බවයි.
කෙසේවෙතත් මාධ්‍යවේදීන්ට සිදුවූ මෙම අපහසුතාවය සම්බන්ධයෙන් සම කැබිනට් මාධ්‍ය ප්‍රකාශකවරයා වශයෙන් තමන් සමාව ඉල්ලා සිටින බව අමාත්‍ය රමේෂ් පතිරණ මහතා එම ප්‍රවෘත්ති සාකච්ඡාවේදී සදහන් කළා.
ඊට අදාළ දර්ශන පහතින්,
