ග්‍රාමීය හා ප්‍රාදේශීය පානීය ජලසම්පාදන ව්‍යාපෘති සංවර්ධන රාජ්‍ය අමාත්‍ය සනත් නිශාන්ත මහතා විසින් ග්‍රාමීය මාර්ග හා අවශේෂ යටිතල පහසුකම් රාජ්‍ය අමාත්‍ය නිමල් ලන්සා මහතාට බැනවදිමින් තර්ජනය කරන හඬපටයක් මේ වනවිට සමාජ මාධ්‍ය තුළ සංසරණය වෙමින් තිබෙනවා.
ශ්‍රී ලංකා නිදහස් පක්ෂයේ ප්‍රාදේශීය සභා මන්ත්‍රීවරුන් කිහිපදෙනෙකු සම්බන්ධ කරගෙන නිමල් ලන්සා මහතා විසින් පුත්තලම දිස්ත්‍රික්කයේ සිදුකරන මාර්ග සංවර්ධන ව්‍යාපෘති කිහිපයක් නතර කරන ලෙසයි එහිදී සනත් නිශාන්ත මහතා තර්ජනාත්මකව පවසන්නේ.
“ඔයා ෆෝන් කට් කෙරුවාට කමක් නෑ. මගේ ආසනේ ශ්‍රී ලංකා නිදහස් පක්ෂෙ එවුන්ට කියලා පාරවල් හදවලා, අපේ පාරවල් සේරම නතර කරවලා. මම මාධ්‍ය සාකච්ඡාවක් තියලා ගහනවා කුඩු පට්ටං වෙන්න ගහනවා. මං උඹට ආයෙ කියන්නෑ නිමල් ලන්සා … මං උඹට ආයෙ කියන්නෙ නෑ, මතක තියාගනිං.
උඹට මං කියන එක අහගෙන ඉන්න බැහැනෙ ? හෙට කරුවලගස්වැව ප්‍රාදේශීය ලේකම් කොට්ඨාසෙ ආනන්ද සරත් කුමාර පාරකට මුල්ගල තියනවා, රණවරාපිටියෙ. නවත්තනවා නම් නවත්තපං. හෙට ඒක තිබ්බොත් මම හෙට හවස උඹට මාධ්‍ය සාකච්ඡාවක් තියලා ගහනවා. මතක තියාගනිං ආහ්. මං උඹට ආයෙ කියන්නෑ” යැයි එහිදී සනත් නිශාන්ත රාජ්‍ය අමාත්‍යවරයා පවසා සිටිනවා.
