ඉන්දියාවෙන් සහ ඔස්ට්‍රෙලියාවෙන් ණය සහන ලබා ගැනීමට කටයුතු කරන බව වෙළඳ අමාත්‍ය ආචාර්ය බන්දුල ගුණවර්ධන මහතා පවසනවා.
ඒ, අප්‍රේල් මසට යෙදෙන සිංහල හා දෙමළ අලුත් අවුරුදු සමයට අත්‍යාවශ්‍ය ආහාර ද්‍රව්‍ය ඇතුළු ආනයනයන් සඳහා බවයි ඔහු පවසන්නේ.
ඉන්දියාවෙන් ඩොලර් බිලියනයක ණය සහනයක් එහිදී අපේක්ෂා කෙරෙන අතර, ඔස්ට්‍රෙලියාවෙන් ඩොලර් මිලියන 200 ක ණය සහනයක් ලබා ගැනීම පිළිබඳව සාකච්ඡා ආරම්භ වී ඇති බවත් සහල්, පරිප්පු, ඖෂධ සහ අනෙකුත් අත්‍යාවශ්‍ය ද්‍රව්‍ය මෙම ණය සහන වැඩපිළිවෙල මගින් ලබා ගැනීමට අපේක්ෂිත බවත් සඳහන්.
එම ආනයනයන් මාස 6 ක පමණ කාලයක් සඳහා ප්‍රමාණවත් වන බවත් ඔස්ට්‍රෙලියාවෙන් ලබා ගැනෙන ණය සහන යටතේ පරිප්පු සහ බාර්ලි ආදිය ලබා ගැනීමට අපේක්ෂා කෙරෙන අතර ඉන්දීය ණය සහන යටතේ අල, ළුෑණු, පරිප්පු සහ ඖෂධ ආනයනය කිරීමට නියමිත බවත් පැවසේ.
මෙම ආනයනයන් සඳහා ගෙවීම් වාරික වශයෙන් මාස්පතා ගෙවීමටයි සැලසුම් කෙරෙන්නේ.
මේ අතර, ඔස්ට්‍රෙලියාවෙන් ආනයනය කෙරෙන පරිප්පු පියළි කිරීම සඳහා මෙරට කර්මාන්තශාලාවක් ඉදිකිරීම පිළිබඳව ද අවධානය යොමුව තිබෙනවා. එවැනි කර්මාන්තශාලාවක් හම්බන්තොට හෝ කොළඹ වරාය ආශ්‍රිතව පිහිටුවීමට කටයුතු කරනු ඇතැයි අපේක්ෂිතයි. මෙතෙක් ඔස්ට්‍රෙලියානු පරිප්පු ශ්‍රී ලංකාව වැනි රටවලට ලැබීමට පෙර පියළි කිරීම එක්සත් අරාබි එමීර් රාජ්‍යයේ දී සිදු කෙරුණා.
