රුපියල් කෝටි 25ක් වැය කර මෙරටට ගෙන්වු මුල්ලේරියාව රසායනාගාරයේ PCR යන්ත්‍රය නැවතත් බිඳවැටී ඇති බවත් එම යන්ත්‍රය අක්‍රියවී ඇත්තේ මේසයේ ඇඳයක් නිසා නොවන බවත් වෛද්‍ය රසායනාගාර තාක්ෂණවේදීන්ගේ සංගමයේ සභාපති රවී කුමුදේශ් මහතා පවසයි.
ඔහු මේ බව පැවසුවේ නොවැම්බර් 16 දින ගුරු මැදුරේ පිහිටි මාධ්‍ය සාකච්ඡාවකදීය.
චීන තානාපති කාර්යාලය එම යන්ත්‍රය අක්‍රිය වීම සම්බන්ධයෙන් පිළිතුරු වශයෙන් කුමක් කීවත් මෙම යන්ත්‍රය ආරම්භයේ පටන්ම දෝෂ සහගත යන්ත්‍රයක් බැවින් එය ඉවත් කර අලුතින් වැඩ කළ හැකි යන්ත්‍රයක් එම රසායනාගාරයට ලබාදිය යුතු බව ඒ මහතා පැවසීය.
‘අද වෙනකොට සෞඛ්‍ය අමාත්‍යාංශයම ප්‍රකාශ කරනවා මුල්ලේරියාව රසායනාගාරයේ PCR යන්ත්‍රය කැඩිලා කියලා. චීන තානාපති කාර්යාලය වරින් වර ඔවුන්ගේ සමාජ ජාලාවල සටහන් තබමින් කියනවා මේ යන්ත්‍රය කැඩිලා නෑ, යන්ත්‍රය හොඳින් වැඩ කරනවා, මේසයේ ප්‍රශ්නයක් තියෙන්නේ කියලා, මේසයේ ඇදයක් නිසා මේක වැඩ කළේ නැත්තේ කියලා. අපි විවිධ රටවල්වලින් ගෙන්වු රසායනාගාර උපකරණ අතිවිශාල ප්‍රමාණයක් භාවිතා කරනවා. අපි දැක්කෙ නෑ රසායනාගාර උපකරණයක ප්‍රශ්නයක් ඇතිවුණාම තානාපති කාර්යාලය තමන්ගෙ සමාජ මාධ්‍ය ගිණුම්වල ඒ පිළිබඳ අදහස් පළ කරනවා.
‘ මේක චීනෙට අදාළ දෙයක් නෙවෙයි සමාගම් අතර තියෙන ගැටළු වෙන්න ඕනෙ. සමාගම් තමා වගකියන්නේ, ඒ සමාගම්වලින් තමා අපි ප්‍රශ්න අහන්නෙ. නමුත් අපි අහපු ප්‍රශ්නවලට උත්තර දුන්නෙ චීන තානාපති කාර්යාලය. ‘
