මූල්‍ය චෝදනා ලැබ මේ වන විට රක්ෂිත බන්ධනාගාරගතව සිටින තිළිණි පියුමාලි නමැත්තිය වෙත තමන්ගේ ජීප් රථයක් ලබා දී ඇති බවට ජනතා විමුක්ති පෙරමුණේ වසන්ත සමරසිංහ නගන චෝදනාව අසත්‍ය බව පූජ්‍ය මුරුත්තෙට්ටුවේ ආනන්ද ස්වාමීන් වහන්සේ පවසනවා.
තමන් සිය ජීප් රථය ලබා දුන්නේ තිළිණි පියුමාලිට නොව කොළඹ මහ නගර සභාවේ නාගරික මන්ත්‍රීවරියක වන ප්‍රියංකා ජයසේකරට බවයි උන්වහන්සේ දෙසා වදාරන්නේ.
තමන් වහන්සේ වෙත ජපානයෙන් වාහනයක් පරිත්‍යාගයක් ලෙස ලැබීමට නියමිතව තිබුණු හෙයින් එතෙක් භාවිතා කරමින් සිටි ජීප් රථය විකිණීමේ අවශ්‍යතාව මතු වූ අතර ඒ අනුව ප්‍රියංකා ජයසේකර මහත්මිය විසින් එය විකුණා මුදල් ලබාදෙන බවට තමන් වහන්සේ සමඟ එකඟ වූ බව උන්වහන්සේ පවසනවා.
එහෙත් එම මුදල් තමන් වහන්සේට නොලැබුණු බවත් සිදුවීම සම්බන්ධයෙන් කොළඹ අපරාධ කොට්ඨාසය විසින් පරීක්ෂණයක් සිදුකරමින් තිබෙන බවත් ප්‍රියංකා ජයසේකර මහත්මියද එම සිදුවීම සම්බන්ධයෙන් අත්අඩංගුවට පත්ව ඇප මත නිදහස්ව සිටින අයෙක් බවත් මුරුත්තෙට්ටුවේ හිමි සඳහන් කර සිටිනවා.
කිසිලෙසකින්වත් තිළිණි පියුමාලි නමැත්තිය පිළිබඳව තමන් වහන්සේ මීට ඉහතදී දැන නොසිටි බවයි උන්වහන්සේ පැවසුවේ.
“ප්‍රියමාලිත් එක්ක මම කතාබහ කරලවත් නැහැ. මගේ ජීප් එක එතුමිය අරගෙන නැහැ. නමුත් මගේ V8 එක ගත්තේ කොළඹ මහනගර සභාවේ නාගරික මන්ත්‍රිවරියක් වශයෙන් කටයුතු කරන ප්‍රියංකා ජයසේකර. මම වාහනේ ගන්නකොට එතුමිය හිටියේ පොහොට්ටුවේ. මට ජපානයෙන් වාහනයක් පරිත්‍යාග කරනකොට මේක විකුණගන්න ඕනේකම තිබුණා. වාහන දෙකක් අවශ්‍ය නැති නිසා තමයි මේක විකුණන්න තීරණය කළේ. එතුමිය මුදල් දෙන්නම් කියලා ගත්තේ. ඇයව අත්අඩංගුවට අරගෙන ඇප මත නිදහස් කරලයි දැන් තිබෙන්නේ.”
