පවත්නා සෞඛ්‍ය අවදානම් තත්ත්වය මත මහජනතාවගේ පොදු ක්‍රියාකාරකම් පාලනය කිරීම සඳහා සෞඛ්‍ය අමාත්‍යාංශය විසින් නව සෞඛ්‍ය මාර්ගෝපදේශ මාලාවක් නිකුත් කර තිබෙනවා.
ඒ අනුව එක් නිවසින් පිටවීමට අවසර ලබාදී ඇත්තේ පුද්ගලයින් දෙදෙනෙකුට පමණයි.
එමෙන්ම පොදු ප්‍රවාහන සේවාවන් වන බස්රථ හා දුම්රියේ ආසන ධාරිතාවයට පමණක් මගීන් ප්‍රවාහනය කල යුතු බවට එහි දැක්වෙනවා.
රජයේ හා පෞද්ගලික අංශයේ කාර්යාලවල අවශ්‍ය කාර්ය මණ්ඩලය සමග පමණක් ක්‍රියාකිරීමට අවසර ලබාදී ඇති අතර හැකි සෑම විටම නිවසේ සිට වැඩකිරීමේ විකල්පය සේවකයන් හට ලබාදිය යුතු වනවා.
රෙදි සාප්පුහී ඇවිදීමට මීටර 1.5 ක ඉඩ ප්‍රමාණයක් එක් පුද්ගලයෙකුට ලැබෙන පරිදි ආයතනයෙන් 50% ක ප්‍රමාණයක් පමණක් පාරිභෝගිකයන් ඇතුළු කරගැනීමට අවසර හිමිවනවා.
පාසල් 50% ක ධාරිතාවයෙන් ක්‍රියාත්මක වුවත් විශ්ව විද්‍යාල තවදුරටත් වසාදැමීමට නිර්දේශ කර තිබෙනවා.
මංගල උත්සව සඳහා අමුත්තන් 150 සීමාව නැවත වරක් පනවා ඇති අතර අවමංගල උත්සව සඳහා පුද්ගලයින් 25 ක් පමණක් සහභාගි කරවන ලෙසයි අදාල නිර්දේශ මගින් සෞඛ්‍ය අමාත්‍යාංශය දක්වා ඇත්තේ.
ගෘහස්ත උත්සව, එළිමහන් උත්සව හෝ සම්මන්ත්‍රණ පැවැත්වීමට කිසිදු අවසරයක් නොලැබෙන අතර මහජනයා එක්රැස්වීම් සඳහාද අවසර හිමිවන්නේ නැහැ.
ළමා උද්‍යානද වසා තැබෙන අතර සැණකෙලි, සංගීත සංදර්ශන හා වෙරළ සාද පැවැත්වීමද තහනම් කර තිබෙනවා.
කැසිනෝ, රාත්‍රී සමාජ ශාලා හා ස්පා වසා දැමීමට නිර්දේශ කර ඇති අතර මද්‍යසාර අලෙවිසැල්වල කවුන්ටර අසල සෙනඟ එක්රැස්වීම වළක්වාගැනීමට එම අලෙවිසැල්වල හිමිකරුවන්ට උපදෙස් ලබාදී තිබෙනවා.
මෙම සෞඛ්‍ය මාර්ගෝපදේශ 2021 මැයි මස 31 වනදා දක්වා වලංගු වනවා.
